ishq bhi humne kiya dost to nadani mein

'ishq bhī ham ne kiyā dost to nādānī meñ

ḳhvāb bunte hī rahe be-sar-o-sāmānī meñ

nā-ḳhudā.ī kā kise hosh rahā paanī meñ

har koī duub gayā apnī nigahbānī meñ

baap beTe kī satā.ish meñ magan jo dekhā

zindagī qahr lagī aisī farāvānī meñ

tujh ko dekhūñ to na ho jā.ūñ maiñ pāra-pāra

mahv-e-hairat huuñ tire 'aks kī hairānī meñ

tirī tasvīr kī kyā ham se hifāzat hotī

ham se kuchh bhī na huā apnī pareshānī meñ

sochtā huuñ ki nahīñ kaam mire karne kā

har koī mahv hai is 'ahd kī 'uryānī meñ

apnī kam-mā.egī le Duubī hameñ bhī 'shahzād'

har koī ġharq jo dekhā tirī arzānī meñ

'ishq bhi hum ne kiya dost to nadani mein

KHwab bunte hi rahe be-sar-o-samani mein

na-KHudai ka kise hosh raha pani mein

har koi dub gaya apni nigahbani mein

bap beTe ki sataish mein magan jo dekha

zindagi qahr lagi aisi farawani mein

tujh ko dekhun to na ho jaun main para-para

mahw-e-hairat hun tere 'aks ki hairani mein

teri taswir ki kya hum se hifazat hoti

hum se kuchh bhi na hua apni pareshani mein

sochta hun ki nahin kaam mere karne ka

har koi mahw hai is 'ahd ki 'uryani mein

apni kam-maegi le Dubi hamein bhi 'shahzad'

har koi gharq jo dekha teri arzani mein