ishq-e-mai husn hai saqi mere maiKHane ka

'ishq-e-mai husn hai saaqī mire maiḳhāne kā

pī to luuñ zarf zarā dekh luuñ paimāne kā

dil meñ aatā hai ma'an sang-e-havādis kā ḳhayāl

naam aatā hai agar shīsha-o-paimāne kā

ruḳhsat-e-sair-o-tamāshā-e-jahāñ hai kis ko

dīdanī aap hai 'ālam mire kāshāne kā

kitne hī monis-e-dard-o-ġham-o-ālām haiñ vaañ

naam bedardoñ meñ badnām hai vīrāne kā

dāstāñ soz-e-mohabbat kī kahe kaun agar

sham' kī lau na bane hausla parvāne kā

rang-o-bū se na banī ruuh kī āḳhir do din

apnā hotā hai koī kahne se begāne kā

dīdanī raqs thā dekhā na tamāshā tum ne

sho’la-e-barq pe ḳhirman ke har ik daane kā

qismat-e-ahl-e-ḳhirad jab vo tajallī hī nahīñ

kis ko batlā.eñ ki kyā ḳhvāb hai dīvāne kā

kahte kahte huā chup qissa-e-hastī 'shabbīr'

ik haqīqat ne bharam kho diyā afsāne kā

'ishq-e-mai husn hai saqi mere maiKHane ka

pi to lun zarf zara dekh lun paimane ka

dil mein aata hai ma'an sang-e-hawadis ka KHayal

nam aata hai agar shisha-o-paimane ka

ruKHsat-e-sair-o-tamasha-e-jahan hai kis ko

didani aap hai 'alam mere kashane ka

kitne hi monis-e-dard-o-gham-o-alam hain wan

nam bedardon mein badnam hai virane ka

dastan soz-e-mohabbat ki kahe kaun agar

sham' ki lau na bane hausla parwane ka

rang-o-bu se na bani ruh ki aaKHir do din

apna hota hai koi kahne se begane ka

didani raqs tha dekha na tamasha tum ne

sho’la-e-barq pe KHirman ke har ek dane ka

qismat-e-ahl-e-KHirad jab wo tajalli hi nahin

kis ko batlaen ki kya KHwab hai diwane ka

kahte kahte hua chup qissa-e-hasti 'shabbir'

ek haqiqat ne bharam kho diya afsane ka