ishq-e-majnun rast hai afsana sach

ishq-e-majnūñ raast hai afsāna sach

baat kahtā hai tirā dīvāna sach

mere ghar kyā aa.e tum aa.ī murād

ho gayā ishrat-kada ġham-ḳhāna sach

dāman-e-sāqī kahāñ dast-e-havas

be-ḳhudī hai shorish-e-rindāna sach

miT gayā ghar ghar kī hasrat rah ga.ī

qābil-e-nazzāra hai vīrāna sach

soz-e-ġham meñ hai gudāz-e-sham.a raast

ātish-e-dil se jalā parvāna sach

be-tire jalve ke dil hai be-faroġh

tū hī niklā raunaq-e-kāshāna sach

be-gumāñ lafz-e-ġhalat hai kā.enāt

hamdamī hai ma.anī-e-begāna sach

naza.a se phir zindagānī ho ga.ī

jāñ-fazā thā jalva-e-jānāna sach

aaj phir hai kyā salā-e-ām-e-mai

sub.h se vā hai dar-e-mai-ḳhāna sach

is se uḌ jaatī hai niiñd aatī huī

mere dard-e-dil kā hai afsāna sach

ho nahīñ saktā ta.attul fikr kā

mahv-e-yād-e-yār hai dīvāna sach

vo sitamgar dost niklā ġhair kā

kyoñ azīzo merā kahnā thā na sach

qatra-e-ḳhūñ se hai kyoñ dil kī umiid

naḳhl ho jā.egā kyā ye daana sach

tere bande haiñ bahut nāzuk dimāġh

bār-e-sar hai afsar-e-shāhāna sach

husn-e-taz.īn yuuñ nasīb-e-ā.ina

hasrat-e-nazzāra meñ hai shāna sach

vo samajhte haiñ fuġhān-e-zauq-e-mai

be-asar hai nāla-e-mastāna sach

kuchh yahāñ hai sāz-e-jam.iyyat 'zakī'

kahiyo ai dānish-var-e-farzāna sach

ishq-e-majnun rast hai afsana sach

baat kahta hai tera diwana sach

mere ghar kya aae tum aai murad

ho gaya ishrat-kada gham-KHana sach

daman-e-saqi kahan dast-e-hawas

be-KHudi hai shorish-e-rindana sach

miT gaya ghar ghar ki hasrat rah gai

qabil-e-nazzara hai virana sach

soz-e-gham mein hai gudaz-e-shama rast

aatish-e-dil se jala parwana sach

be-tire jalwe ke dil hai be-farogh

tu hi nikla raunaq-e-kashana sach

be-guman lafz-e-ghalat hai kaenat

hamdami hai mani-e-begana sach

naza se phir zindagani ho gai

jaan-faza tha jalwa-e-jaanana sach

aaj phir hai kya sala-e-am-e-mai

subh se wa hai dar-e-mai-KHana sach

is se uD jati hai nind aati hui

mere dard-e-dil ka hai afsana sach

ho nahin sakta tattul fikr ka

mahw-e-yaad-e-yar hai diwana sach

wo sitamgar dost nikla ghair ka

kyon azizo mera kahna tha na sach

qatra-e-KHun se hai kyon dil ki umid

naKHl ho jaega kya ye dana sach

tere bande hain bahut nazuk dimagh

bar-e-sar hai afsar-e-shahana sach

husn-e-tazin yun nasib-e-aina

hasrat-e-nazzara mein hai shana sach

wo samajhte hain fughan-e-zauq-e-mai

be-asar hai nala-e-mastana sach

kuchh yahan hai saz-e-jamiyyat 'zaki'

kahiyo ai danish-war-e-farzana sach