ishq gar donon jahan mein kaamran hota nahin

ishq gar donoñ jahāñ meñ kāmrāñ hotā nahīñ

ye zamīñ hotī nahīñ ye āsmāñ hotā nahīñ

jo bhaTak jaatā hai manzil se vufūr-e-shauq meñ

dar-haqīqat vo hamārā kārvāñ hotā nahīñ

ishq kahte haiñ jise ik ātish-e-ḳhāmosh hai

dil hī dil meñ jo sulagtī hai dhuāñ hotā nahīñ

sham.a par kis shaan se gir kar patange ne kahā

ishq meñ andesha-e-sūd-o-ziyāñ hotā nahīñ

ḳhauf-e-roz-e-hashr hai us ko na kuchh fikr-e-jazā

zindagī meñ jis ko marne kā gumāñ hotā nahīñ

zindagī meñ har qadam par Thokareñ khā.īñ magar

dil ke ā.īne pe aks-e-ġham ayaañ hotā nahīñ

'dard' mere ishq ne un ko numāyāñ kar diyā

varna duniyā meñ kahīñ nām-o-nishāñ hotā nahīñ

ishq gar donon jahan mein kaamran hota nahin

ye zamin hoti nahin ye aasman hota nahin

jo bhaTak jata hai manzil se wufur-e-shauq mein

dar-haqiqat wo hamara karwan hota nahin

ishq kahte hain jise ek aatish-e-KHamosh hai

dil hi dil mein jo sulagti hai dhuan hota nahin

shama par kis shan se gir kar patange ne kaha

ishq mein andesha-e-sud-o-ziyan hota nahin

KHauf-e-roz-e-hashr hai us ko na kuchh fikr-e-jaza

zindagi mein jis ko marne ka guman hota nahin

zindagi mein har qadam par Thokaren khain magar

dil ke aaine pe aks-e-gham ayan hota nahin

'dard' mere ishq ne un ko numayan kar diya

warna duniya mein kahin nam-o-nishan hota nahin