ishq hai soz-e-darun isko na bahar rakhna

ishq hai soz-e-darūñ is ko na bāhar rakhnā

baat ho ghar kī agar ghar ke hī andar rakhnā

sach to hai ishq ho yā mushk ye chhuptā kab hai

kitnā mushkil hai nihāñ chiiz ye dam bhar rakhnā

jism-o-jāñ rakhtā huuñ āḳhir ko bashar huuñ maiñ bhī

rabt-e-ehsās mirī jaan barābar rakhnā

nāḳhudā merā nayā aur safīna ḳhasta

yā ḳhudā zer-e-sukūñ sat.h-e-samandar rakhnā

bijliyāñ kauñdne lag jā.eñgī ik aalam meñ

aaj be-parda na tum rū-e-munavvar rakhnā

taaki ḳhilqat tirī himmat kī tujhe daad to de

saaf kar ke na pas-e-qatl tū ḳhanjar rakhnā

kārgar hotī nahīñ jab koī tadbīr mirī

mujh pe lāzim nahīñ taqdīs-e-muqaddar rakhnā

ishq hai soz-e-darun is ko na bahar rakhna

baat ho ghar ki agar ghar ke hi andar rakhna

sach to hai ishq ho ya mushk ye chhupta kab hai

kitna mushkil hai nihan chiz ye dam bhar rakhna

jism-o-jaan rakhta hun aaKHir ko bashar hun main bhi

rabt-e-ehsas meri jaan barabar rakhna

naKHuda mera naya aur safina KHasta

ya KHuda zer-e-sukun sath-e-samandar rakhna

bijliyan kaundne lag jaengi ek aalam mein

aaj be-parda na tum ru-e-munawwar rakhna

taki KHilqat teri himmat ki tujhe dad to de

saf kar ke na pas-e-qatl tu KHanjar rakhna

kargar hoti nahin jab koi tadbir meri

mujh pe lazim nahin taqdis-e-muqaddar rakhna