ishq jab mange hai bas sada-dili mange hai

'ishq jab māñge hai bas sāda-dilī māñge hai

husn be-sāḳhta āshufta-sarī māñge hai

aa gayā raas zamāne ko jab andāz mirā

aa.ina bhī hunar-e-shīsha-garī māñge haiñ

sab kī qismat meñ kahāñ hotā hai ḳhush-rang hayāt

falsafa 'ishq kā lamhoñ se sadī māñge hai

dard uThtā hai to ik pal meñ taḌap jaatā hai

soḳhta dil mirā sandal kī namī māñge hai

jaan jāoge to hairānī tumheñ bhī hogī

kaun kis kis se yahāñ tishna-labī māñge hai

kahnī paḌtī hai ġhazal hasb-e-marātib us ke

qāfiya roz nayā harf-e-ravī māñge hai

gumrahī kyoñ na baḌhe had se ziyāda 'sāhil'

jo bhī nā-ahl hai vo rāhbarī māñge hai

'ishq jab mange hai bas sada-dili mange hai

husn be-saKHta aashufta-sari mange hai

aa gaya ras zamane ko jab andaz mera

aaina bhi hunar-e-shisha-gari mange hain

sab ki qismat mein kahan hota hai KHush-rang hayat

falsafa 'ishq ka lamhon se sadi mange hai

dard uThta hai to ek pal mein taDap jata hai

soKHta dil mera sandal ki nami mange hai

jaan jaoge to hairani tumhein bhi hogi

kaun kis kis se yahan tishna-labi mange hai

kahni paDti hai ghazal hasb-e-maraatib us ke

qafiya roz naya harf-e-rawi mange hai

gumrahi kyon na baDhe had se ziyaada 'sahil'

jo bhi na-ahl hai wo rahbari mange hai