ishq ka ghaw jaan mein rakh kar bhul gai

ishq kā ghaav jaan meñ rakh kar bhuul ga.ī

ḳhud ko ātish-dān meñ rakh kar bhuul ga.ī

nargis ke do phuul uThā kar pheñk diye

aur āñkheñ gul-dān meñ rakh kar bhuul ga.ī

kuchh aañsū to āñkhoñ meñ chhup jaate haiñ

kuchh aañsū muskān meñ rakh kar bhuul ga.ī

ghoñsla thā aur shoḳh havā kī Thokar thī

tinke meñ tūfān meñ rakh kar bhuul ga.ī

jis kī ḳhātir shā.irī kartī rahtī thī

ab us ko dīvān meñ rakh kar bhuul ga.ī

kamre meñ kuchh saa.e nāchte rahte haiñ

sūraj raushan-dān meñ rakh kar bhuul ga.ī

kyā khoyā kyā paayā kuchh mat pūchh sakhī

jīvan ik hizyān meñ rakh kar bhuul ga.ī

sāñsoñ kī mazdūrī meñ jo ishq milā

ik shāhī farmān meñ rakh kar bhuul ga.ī

jaltī dhuup meñ chāñd kā tohfa kyā kartī

shāyad maiñ dālān meñ rakh kar bhuul ga.ī

sūraj chāñd bhī jā kar lauT hī aate haiñ

umr isī imkān meñ rakh kar bhuul ga.ī

phuul se rishte pattī pattī bikhre the

patjhaḌ-rut sāmān meñ rakh kar bhuul ga.ī

is lahje kī os meñ jo āñchal bhīgā

ik TuuTe paimān meñ rakh kar bhuul ga.ī

aaj 'sahar' in do hañstī huī āñkhoñ ko

yādoñ ke juzdān meñ rakh kar bhuul ga.ī

ishq ka ghaw jaan mein rakh kar bhul gai

KHud ko aatish-dan mein rakh kar bhul gai

nargis ke do phul uTha kar phenk diye

aur aankhen gul-dan mein rakh kar bhul gai

kuchh aansu to aankhon mein chhup jate hain

kuchh aansu muskan mein rakh kar bhul gai

ghonsla tha aur shoKH hawa ki Thokar thi

tinke mein tufan mein rakh kar bhul gai

jis ki KHatir shairi karti rahti thi

ab us ko diwan mein rakh kar bhul gai

kamre mein kuchh sae nachte rahte hain

suraj raushan-dan mein rakh kar bhul gai

kya khoya kya paya kuchh mat puchh sakhi

jiwan ek hizyan mein rakh kar bhul gai

sanson ki mazduri mein jo ishq mila

ek shahi farman mein rakh kar bhul gai

jalti dhup mein chand ka tohfa kya karti

shayad main dalan mein rakh kar bhul gai

suraj chand bhi ja kar lauT hi aate hain

umr isi imkan mein rakh kar bhul gai

phul se rishte patti patti bikhre the

patjhaD-rut saman mein rakh kar bhul gai

is lahje ki os mein jo aanchal bhiga

ek TuTe paiman mein rakh kar bhul gai

aaj 'sahar' in do hansti hui aankhon ko

yaadon ke juzdan mein rakh kar bhul gai