ishq ka kuchh bhi na anjam tu ai dil samjha

ishq kā kuchh bhī na anjām tū ai dil samjhā

pahle āsān thā kyā ab jise mushkil samjhā

be-hijāb un ko shab-e-vasl jo dekhā maiñ ne

chāñd se chehre ko rashk-e-mah-e-kāmil samjhā

diq hai vo jaan mirī ishq kī bīmārī se

ki hakīmoñ ne bhī jis ko maraz-e-sil samjhā

bhaveñ hūroñ kī nazar aa.iiñ mujhe talvāreñ

bāġh-e-jannat ko bhī maiñ kūcha-e-qātil samjhā

zarra dekhā jo kabhī muttasil-e-mahr-e-falak

maiñ ne qurb-e-ruḳh-e-pur-nūr-e-sanam til samjhā

bahr-e-taslīm-o-razā ham ne jhukā dī gardan

haa.e afsos ki is par bhī na qātil samjhā

tū nahīñ par tirā jalva to hai mere dil meñ

phir mujhe duur bhalā kyoñ mah-e-kāmil samjhā

ruḳh dikhā kar mujhe kyā dhoke diye qurāñ ke

haath gardan meñ jo Daale maiñ hamā.il samjhā

jab se dīvāna tirī zulf-e-musalsal kā huā

jis ne dekhā mujhe mānind-e-salāsil samjhā

jhelīñ taklīfeñ bahut ishq kī tū ne 'shaidā'

ab na honā kisī be-rahm pe maa.il samjhā

ishq ka kuchh bhi na anjam tu ai dil samjha

pahle aasan tha kya ab jise mushkil samjha

be-hijab un ko shab-e-wasl jo dekha main ne

chand se chehre ko rashk-e-mah-e-kaamil samjha

diq hai wo jaan meri ishq ki bimari se

ki hakimon ne bhi jis ko maraz-e-sil samjha

bhawen huron ki nazar aain mujhe talwaren

bagh-e-jannat ko bhi main kucha-e-qatil samjha

zarra dekha jo kabhi muttasil-e-mahr-e-falak

main ne qurb-e-ruKH-e-pur-nur-e-sanam til samjha

bahr-e-taslim-o-raza hum ne jhuka di gardan

hae afsos ki is par bhi na qatil samjha

tu nahin par tera jalwa to hai mere dil mein

phir mujhe dur bhala kyon mah-e-kaamil samjha

ruKH dikha kar mujhe kya dhoke diye quran ke

hath gardan mein jo Dale main hamail samjha

jab se diwana teri zulf-e-musalsal ka hua

jis ne dekha mujhe manind-e-salasil samjha

jhelin taklifen bahut ishq ki tu ne 'shaida'

ab na hona kisi be-rahm pe mail samjha