ishq ka masud ye anjam hai

ishq kā 'mas.ūd' ye anjām hai

maiñ huuñ dil hai hasrat-e-nākām hai

pūchhte kyā ho ki ab kyā kaam hai

mashġhala aahoñ kā sub.h-o-shām hai

maiñ huuñ aur vo sāqī-e-gulfām hai

mai hai gulshan hai subū hai jaam hai

mar ke hijr-e-yār meñ paayā sukūñ

ab to bas ārām hī ārām hai

shām-e-furqat hai javāb-e-sub.h-e-hashr

jāñ-sitāñ ab durd-e-mai-āshām hai

us ke kūche meñ liye jaatā hai phir

kaisā dīvāna dil-e-nākām hai

dekhiye un kā taġhāful to zarā

pūchhte haiñ aap kā kyā naam hai

qaid-o-bandish hai hamāre vāste

varna is mahfil meñ izn-e-ām hai

is suḳhan-sanjī se ai 'mas.ūd' aaj

dahr meñ mash.hūr terā naam hai

ishq ka 'masud' ye anjam hai

main hun dil hai hasrat-e-nakaam hai

puchhte kya ho ki ab kya kaam hai

mashghala aahon ka subh-o-sham hai

main hun aur wo saqi-e-gulfam hai

mai hai gulshan hai subu hai jam hai

mar ke hijr-e-yar mein paya sukun

ab to bas aaram hi aaram hai

sham-e-furqat hai jawab-e-subh-e-hashr

jaan-sitan ab durd-e-mai-asham hai

us ke kuche mein liye jata hai phir

kaisa diwana dil-e-nakaam hai

dekhiye un ka taghaful to zara

puchhte hain aap ka kya nam hai

qaid-o-bandish hai hamare waste

warna is mahfil mein izn-e-am hai

is suKHan-sanji se ai 'masud' aaj

dahr mein mashhur tera nam hai