ishq ka phul to sahra mein khila karta hai

ishq kā phuul to sahrā meñ khilā kartā hai

ek ik zarra jahāñ rashk-o-duā kartā hai

ye burā vaqt hī nāzil huā sar par varna

apne ḳhvāboñ se bhalā koī Darā kartā hai

zaḳhm pal bhar kā davā roz duā barsoñ tak

yuuñ ilāj-e-ġham-e-mahbūb huā kartā hai

dil ko sahrā diyā āñkhoñ ko samundar baḳhshā

sho.abde aise vo dam-bāz kiyā kartā hai

ḳhud ko tanhā na samajh jaam uThā le 'zāhid'

aisā sāthī to muqaddar se milā kartā hai

ishq ka phul to sahra mein khila karta hai

ek ek zarra jahan rashk-o-dua karta hai

ye bura waqt hi nazil hua sar par warna

apne KHwabon se bhala koi Dara karta hai

zaKHm pal bhar ka dawa roz dua barson tak

yun ilaj-e-gham-e-mahbub hua karta hai

dil ko sahra diya aankhon ko samundar baKHsha

shoabde aise wo dam-baz kiya karta hai

KHud ko tanha na samajh jam uTha le 'zahid'

aisa sathi to muqaddar se mila karta hai