ishq ke kaam ko anjam nahin karte hum

'ishq ke kaam ko anjām nahīñ karte ham

'ishq ho jaa.e to phir kaam nahīñ karte ham

aise lamhoñ meñ vo kartā hai 'atā ḳhil'at-e-vasl

jab koī ḳhvāhish-e-in'ām nahīñ karte ham

pūjte pūjte ik but ko ḳhudā kar Daalā

kaun kahtā hai ki islām nahīñ karte ham

aap kā jism sharī'at kā hai pāband bahut

jā.iye aap pe ilhām nahīñ karte ham

devtāoñ ko laḌāte nahīñ aapas meñ kabhī

krishn karte haiñ to phir raam nahīñ karte ham

barhana hī haram-e-jism kā karte haiñ tavāf

ruuh kī gardish-e-ehrām nahīñ karte ham

us ke dīdār kā sūraj nikal aa.e jis roz

sub.h se phir talab-e-shām nahīñ karte ham

'farhat-ehsās' tujhe shā'irī karne ke liye

ulTā-sīdhā tirā kyā kaam nahīñ karte ham

'ishq ke kaam ko anjam nahin karte hum

'ishq ho jae to phir kaam nahin karte hum

aise lamhon mein wo karta hai 'ata KHil'at-e-wasl

jab koi KHwahish-e-in'am nahin karte hum

pujte pujte ek but ko KHuda kar Dala

kaun kahta hai ki islam nahin karte hum

aap ka jism shari'at ka hai paband bahut

jaiye aap pe ilham nahin karte hum

dewtaon ko laDate nahin aapas mein kabhi

krishn karte hain to phir ram nahin karte hum

barhana hi haram-e-jism ka karte hain tawaf

ruh ki gardish-e-ehram nahin karte hum

us ke didar ka suraj nikal aae jis roz

subh se phir talab-e-sham nahin karte hum

'farhat-ehsas' tujhe sha'iri karne ke liye

ulTa-sidha tera kya kaam nahin karte hum