ishq ke mai-kade mein aa ranj-o-alam ko bhul ja

ishq ke mai-kade meñ aa ranj-o-alam ko bhuul jā

shīsha-e-mai hai sāmne shiddat-e-ġham ko bhuul jā

jalva hai us kā rū-ba-rū jis kī hai tujh ko justujū

mahv-e-jamāl-e-yār ho dair-o-haram ko bhuul jā

dil meñ ye ġhaur kar zarā kis pe karegā tū jafā

ham na kareñge ab gila shauq se ham ko bhuul jā

bāda-parast hai agar jām-e-shikasta ko na dekh

tishna-labī pe naaz kar sāġhar-e-jam ko bhuul jā

ishq kī shaan hai yahī ishq kī jaan hai yahī

baḌh ke unheñ gale lagā zulm-o-sitam ko bhuul jā

koī nahīñ hai jis ko ham apnā kaheñ jahān meñ

'shā.ir' isī meñ ḳhair hai lutf-o-karam ko bhuul jā

ishq ke mai-kade mein aa ranj-o-alam ko bhul ja

shisha-e-mai hai samne shiddat-e-gham ko bhul ja

jalwa hai us ka ru-ba-ru jis ki hai tujh ko justuju

mahw-e-jamal-e-yar ho dair-o-haram ko bhul ja

dil mein ye ghaur kar zara kis pe karega tu jafa

hum na karenge ab gila shauq se hum ko bhul ja

baada-parast hai agar jam-e-shikasta ko na dekh

tishna-labi pe naz kar saghar-e-jam ko bhul ja

ishq ki shan hai yahi ishq ki jaan hai yahi

baDh ke unhen gale laga zulm-o-sitam ko bhul ja

koi nahin hai jis ko hum apna kahen jahan mein

'shair' isi mein KHair hai lutf-o-karam ko bhul ja