ishq ke raaz-ha-e-pinhan ko

ishq ke rāz-hā-e-pinhāñ ko

kaun samjhā hai kis ne jaanā hai

farq-e-maut-o-hayāt ye samjho

ik haqīqat hai ik fasāna hai

ab zarā tez-gām ai rahrav

ho ga.ī shaam duur jaanā hai

har qadam par fareb khaa.e haiñ

husn-e-zan kā bhī kyā Thikānā hai

jis ko tum kah rahe ho dīvāna

us kī Thokar meñ ik zamānā hai

barq aa.e hazār baar aa.e

ham ko phir āshiyāñ banānā hai

amn-e-sāhil se kyā ġharaz un ko

jin ko tūfāñ meñ Duub jaanā hai

ab kahāñ zo.am-e-bāl-o-par baaqī

ab koī daam hai na daana hai

ye ḳhizāñ ke hasīn saa.e haiñ

fasl-e-gul kā to ik bahānā hai

vo bhī din the ki thā chaman apnā

ab to bhūlā huā fasāna hai

jaane kyā ho gayā zamāne ko

jaane kaisā ajab zamāna hai

mauj-zan dil meñ jazba-e-nafrat

aur andāz dostāna hai

ab 'qamar' ḳhair ho gulistāñ kī

barq kī zad pe āshiyāna hai

ishq ke raaz-ha-e-pinhan ko

kaun samjha hai kis ne jaana hai

farq-e-maut-o-hayat ye samjho

ek haqiqat hai ek fasana hai

ab zara tez-gam ai rahraw

ho gai sham dur jaana hai

har qadam par fareb khae hain

husn-e-zan ka bhi kya Thikana hai

jis ko tum kah rahe ho diwana

us ki Thokar mein ek zamana hai

barq aae hazar bar aae

hum ko phir aashiyan banana hai

amn-e-sahil se kya gharaz un ko

jin ko tufan mein Dub jaana hai

ab kahan zoam-e-baal-o-par baqi

ab koi dam hai na dana hai

ye KHizan ke hasin sae hain

fasl-e-gul ka to ek bahana hai

wo bhi din the ki tha chaman apna

ab to bhula hua fasana hai

jaane kya ho gaya zamane ko

jaane kaisa ajab zamana hai

mauj-zan dil mein jazba-e-nafrat

aur andaz dostana hai

ab 'qamar' KHair ho gulistan ki

barq ki zad pe aashiyana hai