ishq ke shahr ki kuchh aab-o-hawa aur hi hai

ishq ke shahr kī kuchh āb-o-havā aur hī hai

us ke sahrā ko jo dekhā to fazā aur hī hai

tujh se kuchh kaam nahīñ duur ho aage se nasīm

vā kare ġhuncha-e-dil ko vo sabā aur hī hai

nabz par merī abas haath tū rakhtā hai tabīb

ye maraz aur hai aur is kī davā aur hī hai

gul to gulshan meñ hazāroñ nazar aa.e lekin

us ke chehre ko jo dekhā to safā aur hī hai

zāhido vird-vazā.if se nahīñ hāsil-e-kār

jis ko ho husn-e-ijābat vo duā aur hī hai

ai jaras harza-dirā ho na tū itnā chup rah

pahuñche pas-māñda ba-manzil vo sadā aur hī hai

mohtasib ham se abas kiina rakhe hai 'hātim'

jo nasha ham ne piyā hai vo nashā aur hī hai

ishq ke shahr ki kuchh aab-o-hawa aur hi hai

us ke sahra ko jo dekha to faza aur hi hai

tujh se kuchh kaam nahin dur ho aage se nasim

wa kare ghuncha-e-dil ko wo saba aur hi hai

nabz par meri abas hath tu rakhta hai tabib

ye maraz aur hai aur is ki dawa aur hi hai

gul to gulshan mein hazaron nazar aae lekin

us ke chehre ko jo dekha to safa aur hi hai

zahido wird-wazaif se nahin hasil-e-kar

jis ko ho husn-e-ijabat wo dua aur hi hai

ai jaras harza-dira ho na tu itna chup rah

pahunche pas-manda ba-manzil wo sada aur hi hai

mohtasib hum se abas kina rakhe hai 'hatim'

jo nasha hum ne piya hai wo nasha aur hi hai