ishq ke zamane bhi kya ajab zamane the

'ishq ke zamāne bhī kyā 'ajab zamāne the

aag par bhī chalnā thā paañv bhī bachāne the

kuchh dhuāñ bhī shāmil thā shahr kī havāoñ meñ

kuchh hamārī āñkhoñ meñ zaḳhm bhī purāne the

ratjagoñ ne bīnā.ī chhīn lī to hairat kyā

'aql ke kabhī tum ne mashvare na maane the

kitnī jān-levā thī kashmakash mohabbat kī

tere raaz the dil meñ tujh se hī chhupāne the

rāsta dikhāte the lafz raushnī ban kar

kaise log the vo bhī vo bhī kyā zamāne the

'ishq ke zamane bhi kya 'ajab zamane the

aag par bhi chalna tha panw bhi bachane the

kuchh dhuan bhi shamil tha shahr ki hawaon mein

kuchh hamari aankhon mein zaKHm bhi purane the

ratjagon ne binai chhin li to hairat kya

'aql ke kabhi tum ne mashware na mane the

kitni jaan-lewa thi kashmakash mohabbat ki

tere raaz the dil mein tujh se hi chhupane the

rasta dikhate the lafz raushni ban kar

kaise log the wo bhi wo bhi kya zamane the