ishq ki chausar kis ne kheli ye to khel hamare hain

ishq kī chausar kis ne khelī ye to khel hamāre haiñ

dil kī baazī maat huī to jaan kī baazī haare haiñ

kaise kaise laḳht-e-jigar haiñ kyā kyā dil ke paare haiñ

aise la.al kahāñ duniyā meñ jaise la.al hamāre haiñ

is ko maarā us ko maarā ye bismil vo TuuT gayā

nok palak vāloñ se Dariye qātil un ke ishāre haiñ

chhalnī chhalnī dil bhī jigar bhī rauzan rauzan siina bhī

ek nigāh-e-nāz ne terī tiir hazāroñ maare haiñ

phūñk rahā hai soz-e-nihānī kaun is aag pe Daale paanī

dil kī lagī ne aag lagā dī daaġh nahīñ añgāre haiñ

lāla-ruḳhoñ meñ umr gizārī dekhī un kī fasl-e-bahār

aaj bhī gul se gāloñ vaale mujh ko 'mubārak' pyāre haiñ

ishq ki chausar kis ne kheli ye to khel hamare hain

dil ki bazi mat hui to jaan ki bazi haare hain

kaise kaise laKHt-e-jigar hain kya kya dil ke pare hain

aise lal kahan duniya mein jaise lal hamare hain

is ko mara us ko mara ye bismil wo TuT gaya

nok palak walon se Dariye qatil un ke ishaare hain

chhalni chhalni dil bhi jigar bhi rauzan rauzan sina bhi

ek nigah-e-naz ne teri tir hazaron mare hain

phunk raha hai soz-e-nihani kaun is aag pe Dale pani

dil ki lagi ne aag laga di dagh nahin angare hain

lala-ruKHon mein umr gizari dekhi un ki fasl-e-bahaar

aaj bhi gul se galon wale mujh ko 'mubarak' pyare hain