ishq ki jurat se khele baDh ke apni jaan par

'ishq kī jur.at se khele baḌh ke apnī jaan par

aañch aane dī na ham ne aaj tak īmān par

vaqt ne qadreñ badal diiñ laakh is ke bāvajūd

haq bahut kuchh hai abhī insān kā insān par

ḳhaar ḳhushbū de rahe haiñ aaj gulshan ke liye

phuul gul-daste kī sūrat meñ haiñ ātish-dān par

aaj bhī mahloñ meñ sāzish is tarah hotī to hai

ek hangāme se ban jaatī hai sab kī jaan par

us farishte ne na chhoḌā un kā dāman thaam kar

shaiḳh jī paḌhte rahe lāhaul tak shaitān par

kaun jaane kal havā kyā ruḳh karegī iḳhtiyār

ḳhush na hoñ aaġhā musībat hai agar afġhān par

inqilāb aane to do insāf bhī ho jā.egā

phuljhaḌī bhārī paḌegī aag ke tūfān par

ham bhī rakhte haiñ vafā ke shahr meñ apnā maqām

haq barahman kā nahīñ hai saare hindustān par

chāhiye 'zaidī' falak par ghan-garaj ke saath saath

harf aane de na bijlī bādaloñ kī aan par

'ishq ki jurat se khele baDh ke apni jaan par

aanch aane di na hum ne aaj tak iman par

waqt ne qadren badal din lakh is ke bawajud

haq bahut kuchh hai abhi insan ka insan par

KHar KHushbu de rahe hain aaj gulshan ke liye

phul gul-daste ki surat mein hain aatish-dan par

aaj bhi mahlon mein sazish is tarah hoti to hai

ek hangame se ban jati hai sab ki jaan par

us farishte ne na chhoDa un ka daman tham kar

shaiKH ji paDhte rahe lahaul tak shaitan par

kaun jaane kal hawa kya ruKH karegi iKHtiyar

KHush na hon aagha musibat hai agar afghan par

inqilab aane to do insaf bhi ho jaega

phuljhaDi bhaari paDegi aag ke tufan par

hum bhi rakhte hain wafa ke shahr mein apna maqam

haq barahman ka nahin hai sare hindustan par

chahiye 'zaidi' falak par ghan-garaj ke sath sath

harf aane de na bijli baadalon ki aan par