ishq ki manzil mein ab tak rasm mar jaane ki hai

ishq kī manzil meñ ab tak rasm mar jaane kī hai

husn kī mahfil meñ ab bhī ḳhaak parvāne kī hai

ārzū-e-shauq kaif-e-mustaqil paane kī hai

dil kī har taḳhrīb meñ ta.amīr vīrāne kī hai

mehr-e-qabl-e-shām kī raftār mastāne kī hai

matl.a-e-rañg-e-shafaq meñ shaan maiḳhāne kī hai

sham-e-mahfil bhī nahīñ aur ahl-e-mahfil bhī nahīñ

nāzish-e-mahfil sahar tak ḳhaak parvāne kī hai

ho sakegī kis tarah sarf-e-qalam rūdād-e-dil

ab bhī zer-e-ġhaur surḳhī ġham ke afsāne kī hai

kyā sukūn-e-kaif de rañgīn māhaul-e-qafas

har ghaḌī pesh-e-nazar tasvīr kāshāne kī hai

chand lamhoñ ko chale aanā mire marne ke ba.ad

kyā zarūrat jīte-jī taklīf farmāne kī hai

aur kyā hotā ziyāda is se ehsās-e-vafā

sham.a ke dāman meñ koī shart parvāne kī hai

bandagī mashrūt ho saktī nahīñ ahl-e-nazar

''is meñ koī shart ka.abe kī na but-ḳhāne kī hai

dāstān-e-ārzū hai naġhma-e-ahd-e-shabāb

is kī surḳhī par zarūrat ġhaur farmāne kī hai

markaz-e-ahl-e-nazar hai 'zeb' nairañg-e-ḳhayāl

phir kamī kyuuñ manzar-e-fitrat pe chhā jaane kī hai

ishq ki manzil mein ab tak rasm mar jaane ki hai

husn ki mahfil mein ab bhi KHak parwane ki hai

aarzu-e-shauq kaif-e-mustaqil pane ki hai

dil ki har taKHrib mein tamir virane ki hai

mehr-e-qabl-e-sham ki raftar mastane ki hai

matla-e-rang-e-shafaq mein shan maiKHane ki hai

sham-e-mahfil bhi nahin aur ahl-e-mahfil bhi nahin

nazish-e-mahfil sahar tak KHak parwane ki hai

ho sakegi kis tarah sarf-e-qalam rudad-e-dil

ab bhi zer-e-ghaur surKHi gham ke afsane ki hai

kya sukun-e-kaif de rangin mahaul-e-qafas

har ghaDi pesh-e-nazar taswir kashane ki hai

chand lamhon ko chale aana mere marne ke baad

kya zarurat jite-ji taklif farmane ki hai

aur kya hota ziyaada is se ehsas-e-wafa

shama ke daman mein koi shart parwane ki hai

bandagi mashrut ho sakti nahin ahl-e-nazar

is mein koi shart kabe ki na but-KHane ki hai

dastan-e-arzu hai naghma-e-ahd-e-shabab

is ki surKHi par zarurat ghaur farmane ki hai

markaz-e-ahl-e-nazar hai 'zeb' nairang-e-KHayal

phir kami kyun manzar-e-fitrat pe chha jaane ki hai