ishq majbur-e-fughan ai dil-e-nashad nahin

ishq majbūr-e-fuġhāñ ai dil-e-nāshād nahīñ

ye to ik husn kī tā.īd hai fariyād nahīñ

lazzat-e-be-ḳhudī-e-dīd kī rūdād na pūchh

ik fasāna hai jo kuchh yaad hai kuchh yaad nahīñ

ek pāband-e-vafā ek jafā kā pāband

ishq majbūr sahī husn bhī āzād nahīñ

husn-e-ma.anī kī tamāshā.ī haiñ nazreñ merī

paḌh rahā huuñ vo sahīfe jo mujhe yaad nahīñ

aur bedār huā ishq-o-vafā kā ehsās

kaun kahtā hai ki kuchh hāsil-e-bedād nahīñ

mere me.ayār-e-mohabbat ko na pūchho mujh se

intihā ye hai ki ab tum bhī mujhe yaad nahīñ

ḳhaak samjhegā vo asrār-e-mohabbat ai dost

jo mirī tarah tire ishq meñ barbād nahīñ

mere dil meñ tirī taskīn ke sau pahlū the

o mire bhūlne vaale tujhe kyā yaad nahīñ

yās-o-hirmāñ kā ye aalam hai ki allāh allāh

ab ye dil tere tasavvur se bhī ābād nahīñ

lazzat-e-ishq hai bedād-o-sitam ke dam se

vo chaman hī nahīñ jis meñ koī sayyād nahīñ

ab bhī miltā hai mujhe 'ārzū' ishrat kā payām

mā.il-e-aish magar ḳhātir-e-nāshād nahīñ

ishq majbur-e-fughan ai dil-e-nashad nahin

ye to ek husn ki taid hai fariyaad nahin

lazzat-e-be-KHudi-e-did ki rudad na puchh

ek fasana hai jo kuchh yaad hai kuchh yaad nahin

ek paband-e-wafa ek jafa ka paband

ishq majbur sahi husn bhi aazad nahin

husn-e-mani ki tamashai hain nazren meri

paDh raha hun wo sahife jo mujhe yaad nahin

aur bedar hua ishq-o-wafa ka ehsas

kaun kahta hai ki kuchh hasil-e-bedad nahin

mere meayar-e-mohabbat ko na puchho mujh se

intiha ye hai ki ab tum bhi mujhe yaad nahin

KHak samjhega wo asrar-e-mohabbat ai dost

jo meri tarah tere ishq mein barbaad nahin

mere dil mein teri taskin ke sau pahlu the

o mere bhulne wale tujhe kya yaad nahin

yas-o-hirman ka ye aalam hai ki allah allah

ab ye dil tere tasawwur se bhi aabaad nahin

lazzat-e-ishq hai bedad-o-sitam ke dam se

wo chaman hi nahin jis mein koi sayyaad nahin

ab bhi milta hai mujhe 'arzu' ishrat ka payam

mail-e-aish magar KHatir-e-nashad nahin