ishq mehnat ka sila had se siwa mangta hai

ishq mehnat kā sila had se sivā māñgtā hai

dil vo mazdūr hai ujrat meñ vafā māñgtā hai

be-sabab saḌkoñ pe āvāra sā ik nañgā badan

koī dīvāna hai zaḳhmoñ kī qabā māñgtā hai

vo kasāfat hai havāoñ meñ ki dam ghuT jaa.e

phir bhī jiine kī har insān duā māñgtā hai

tere is fe.al kā mafhūm samajhnā mushkil

tū hai muḳhtār magar merī razā māñgtā hai

ham qalandar kī nazar aur kahīñ hotī hai

ham nahīñ māñgte vo shai jo gadā māñgtā hai

gher rakkhā hai use vaqt ke fir.aunoñ ne

raah paanī meñ banā de vo asā māñgtā hai

paañv baḌhte nahīñ kuchle hue rastoñ kī taraf

terā 'maqsūd' alag apnī dishā māñgtā hai

ishq mehnat ka sila had se siwa mangta hai

dil wo mazdur hai ujrat mein wafa mangta hai

be-sabab saDkon pe aawara sa ek nanga badan

koi diwana hai zaKHmon ki qaba mangta hai

wo kasafat hai hawaon mein ki dam ghuT jae

phir bhi jine ki har insan dua mangta hai

tere is feal ka mafhum samajhna mushkil

tu hai muKHtar magar meri raza mangta hai

hum qalandar ki nazar aur kahin hoti hai

hum nahin mangte wo shai jo gada mangta hai

gher rakkha hai use waqt ke firaunon ne

rah pani mein bana de wo asa mangta hai

panw baDhte nahin kuchle hue raston ki taraf

tera 'maqsud' alag apni disha mangta hai