ishq mein chahiye ye kar jaana

ishq meñ chāhiye ye kar jaanā

kal ke marne se aaj mar jaanā

kījiye zab.h shauq se mujh ko

sar kā jaanā hai dard-e-sar jaanā

kuchh samajh kar nikāliye mujh ko

pahle kahiye ki hai kidhar jaanā

dil ko samjhe to ham yahī samjhe

ek dushman ko apne ghar jaanā

abhī aa.e ho aur kahte ho

hai mujhe to zarūr ghar jaanā

ḳhuub khilvā.ī Thokareñ dil ne

ham ne gumrāh ko rāhbar jaanā

le gayā shauq bazm-e-dushman meñ

is ko kyoñ maiñ ne bā-ḳhabar jaanā

ḳhuub aatā hai aap ko sāhib

kabhī kahnā kabhī mukar jaanā

vo chale aaj bazm-e-dushman meñ

jazb-e-dil kuchh to kaam kar jaanā

jaao jaao vo 'lutf' kahte haiñ

ziist se chāhiye guzar jaanā

ishq mein chahiye ye kar jaana

kal ke marne se aaj mar jaana

kijiye zabh shauq se mujh ko

sar ka jaana hai dard-e-sar jaana

kuchh samajh kar nikaliye mujh ko

pahle kahiye ki hai kidhar jaana

dil ko samjhe to hum yahi samjhe

ek dushman ko apne ghar jaana

abhi aae ho aur kahte ho

hai mujhe to zarur ghar jaana

KHub khilwai Thokaren dil ne

hum ne gumrah ko rahbar jaana

le gaya shauq bazm-e-dushman mein

is ko kyon main ne ba-KHabar jaana

KHub aata hai aap ko sahib

kabhi kahna kabhi mukar jaana

wo chale aaj bazm-e-dushman mein

jazb-e-dil kuchh to kaam kar jaana

jao jao wo 'lutf' kahte hain

zist se chahiye guzar jaana