ishq mein dekhin na diwanon ne rah ki KHwariyan

'ishq meñ dekhīñ na dīvānoñ ne rah kī ḳhvāriyāñ

'aql vaale ghar meñ karte rah ga.e tayyāriyāñ

zindagī ke mai-kade meñ maut ke chalte haiñ jaam

jaam piine ke liye sab kī lagī haiñ bāriyāñ

jo bhī kāñToñ par chalā āḳhir vo pā.egā gulāb

bā'is-e-in'ām haiñ ye raah kī dushvāriyāñ

jin sa'īdoñ ne kiyā puurā siyām-e-zindagī

vo kareñge meva-hā-e-ḳhuld se iftāriyāñ

paas se dekheñ to khultī hai haqīqat husn kī

duur se lagtī haiñ saarī sūrateñ hī pyāriyāñ

kaun kahtā hai jahāñ se rasm-e-yārī uTh ga.ī

ik na ik din rang le ā.eñgī apnī yāriyāñ

dūsroñ se maiñ huuñ mujh se dūsre haiñ be-ḳhabar

vaah maulā kyā 'ajab haiñ teriyāñ sattāriyāñ

shā'irān-e-'ahd-e-nau ne kar diyā urdu kā ḳhuuñ

shā'irī ke naam par karne lage fankāriyāñ

'ishq mein dekhin na diwanon ne rah ki KHwariyan

'aql wale ghar mein karte rah gae tayyariyan

zindagi ke mai-kade mein maut ke chalte hain jam

jam pine ke liye sab ki lagi hain bariyan

jo bhi kanTon par chala aaKHir wo paega gulab

ba'is-e-in'am hain ye rah ki dushwariyan

jin sa'idon ne kiya pura siyam-e-zindagi

wo karenge mewa-ha-e-KHuld se iftariyan

pas se dekhen to khulti hai haqiqat husn ki

dur se lagti hain sari suraten hi pyariyan

kaun kahta hai jahan se rasm-e-yari uTh gai

ek na ek din rang le aaengi apni yariyan

dusron se main hun mujh se dusre hain be-KHabar

wah maula kya 'ajab hain teriyan sattariyan

sha'iran-e-'ahd-e-nau ne kar diya urdu ka KHun

sha'iri ke nam par karne lage fankariyan