ishq mein iztirab ki duniya

'ishq meñ iztirāb kī duniyā

dūsrī hai 'azāb kī duniyā

ek mā'nā meñ donoñ haiñ mausūm

merī duniyā habāb kī duniyā

use chāhā azal se chāhā jise

marhabā intiḳhāb kī duniyā

shaan mujh ko dikhātā hai mahshar

al-madad iztirāb kī duniyā

baḌh ga.e jab hudūd-e-hastī se

uTh ga.ī ḳhud hijāb kī duniyā

'ishq meñ jab vafā pe baat aa.ī

ban gayā dil javāb kī duniyā

is karam par bhī tum se ban na sakī

kisī ḳhāna-ḳharāb kī duniyā

kaun shai meñ nahīñ vo jalva-pazīr

hai rivājan hijāb kī duniyā

aane do vaqt-e-pursish-e-ā'māl

chashm-e-tar hai javāb kī duniyā

dekh 'rāfat' tū apnā mustaqbil

tā-ba-kai ye shabāb kī duniyā

'ishq mein iztirab ki duniya

dusri hai 'azab ki duniya

ek ma'na mein donon hain mausum

meri duniya habab ki duniya

use chaha azal se chaha jise

marhaba intiKHab ki duniya

shan mujh ko dikhata hai mahshar

al-madad iztirab ki duniya

baDh gae jab hudud-e-hasti se

uTh gai KHud hijab ki duniya

'ishq mein jab wafa pe baat aai

ban gaya dil jawab ki duniya

is karam par bhi tum se ban na saki

kisi KHana-KHarab ki duniya

kaun shai mein nahin wo jalwa-pazir

hai riwajan hijab ki duniya

aane do waqt-e-pursish-e-a'mal

chashm-e-tar hai jawab ki duniya

dekh 'rafat' tu apna mustaqbil

ta-ba-kai ye shabab ki duniya