ishq mein kaam na aaya gham-e-pinhan mera

'ishq meñ kaam na aayā ġham-e-pinhāñ merā

un se bhī chhup na sakā hāl-e-pareshāñ merā

tābish-e-husn hai aur ḳhāna-e-vīrāñ merā

aaj kaam aa hī gayā zauq-e-farāvāñ merā

ai ḳhushā un ke liye hāl-e-pareshāñ merā

vo haiñ aur tazkira-e-chāk-garebāñ merā

kāfir-e-'ishq huuñ maiñ tujh ko ḳhabar kyā vā'iz

tū ne dekhā hī nahīñ hāsil-e-īmāñ merā

dekh kar fart-e-alam meñ mujhe mā.il-ba-sukūt

chheḌ detā hai koī tār-e-rag-e-jāñ merā

un se kyā shikva ki barbād-e-mohabbat huuñ maiñ

luT gayā apne hī hāthoñ sar-o-sāmāñ merā

vo to mā.il-ba-numā.ish the magar un ke huzūr

aaj tak uTh na sakā dīda-e-hairāñ merā

maiñ bhī ḳhud.dār mirā 'ishq bhī ḳhud.dār 'hazīñ'

un ke aage bhī na phailā kabhī dāmāñ merā

'ishq mein kaam na aaya gham-e-pinhan mera

un se bhi chhup na saka haal-e-pareshan mera

tabish-e-husn hai aur KHana-e-viran mera

aaj kaam aa hi gaya zauq-e-farawan mera

ai KHusha un ke liye haal-e-pareshan mera

wo hain aur tazkira-e-chaak-gareban mera

kafir-e-'ishq hun main tujh ko KHabar kya wa'iz

tu ne dekha hi nahin hasil-e-iman mera

dekh kar fart-e-alam mein mujhe mail-ba-sukut

chheD deta hai koi tar-e-rag-e-jaan mera

un se kya shikwa ki barbaad-e-mohabbat hun main

luT gaya apne hi hathon sar-o-saman mera

wo to mail-ba-numaish the magar un ke huzur

aaj tak uTh na saka dida-e-hairan mera

main bhi KHuddar mera 'ishq bhi KHuddar 'hazin'

un ke aage bhi na phaila kabhi daman mera