ishq mein kamtar hanse aur beshtar roya kiye

ishq meñ kamtar hañse aur beshtar royā kiye

ek shab kā lutf barsoñ yaad kar royā kiye

taar rone kā na TuuTā apne mātam-ḳhāna meñ

mar ga.e jab ham hamāre nauhagar royā kiye

rone vāloñ par thā vājib āshiq-e-giryāñ kā urs

har baras abr aa ke merī ḳhaak par royā kiye

zauq hai rone se yaañ tak vasl kī shab meñ bhī ham

yaar ke paañv pe rakh kar apnā sar royā kiye

taur ye bigḌā hai us kī bazm kā ik dam ko ham

vaañ ga.e the aa ke pahroñ apne ghar royā kiye

ḳhalq ko parda-nashīñ ke ishq kā shub.ha huā

aañkh par aksar jo ham rūmāl dhar royā kiye

apne rone par jo rahm aaya use ham aur bhī

us ke dikhlāne ko mal-mal chashm-e-tar royā kiye

ishq meñ tāsīr gar rakhtā hai kuchh abr-e-safed

ham abas ḳhūn-e-dil-o-laḳht-e-jigar royā kiye

un ke dīvānoñ ko bhī kyā zabt hai auqāt kā

do pahar hañste rahe gar do pahar royā kiye

rone meñ kal raat ġhaflat is qadar taarī huī

yaar aa kar phir gayā ham be-ḳhabar royā kiye

kuchh hamīñ giryāñ nahīñ haiñ dūrī-e-ahbāb se

hashr tak is ġham meñ sab jinn-o-bashar royā kiye

dil ke jaane kā 'shahīdī' hādisa aisā nahīñ

kuchh na ro.e aah agar ham umr-bhar royā kiye

ishq mein kamtar hanse aur beshtar roya kiye

ek shab ka lutf barson yaad kar roya kiye

tar rone ka na TuTa apne matam-KHana mein

mar gae jab hum hamare nauhagar roya kiye

rone walon par tha wajib aashiq-e-giryan ka urs

har baras abr aa ke meri KHak par roya kiye

zauq hai rone se yan tak wasl ki shab mein bhi hum

yar ke panw pe rakh kar apna sar roya kiye

taur ye bigDa hai us ki bazm ka ek dam ko hum

wan gae the aa ke pahron apne ghar roya kiye

KHalq ko parda-nashin ke ishq ka shubha hua

aankh par aksar jo hum rumal dhar roya kiye

apne rone par jo rahm aaya use hum aur bhi

us ke dikhlane ko mal-mal chashm-e-tar roya kiye

ishq mein tasir gar rakhta hai kuchh abr-e-safed

hum abas KHun-e-dil-o-laKHt-e-jigar roya kiye

un ke diwanon ko bhi kya zabt hai auqat ka

do pahar hanste rahe gar do pahar roya kiye

rone mein kal raat ghaflat is qadar tari hui

yar aa kar phir gaya hum be-KHabar roya kiye

kuchh hamin giryan nahin hain duri-e-ahbab se

hashr tak is gham mein sab jinn-o-bashar roya kiye

dil ke jaane ka 'shahidi' hadisa aisa nahin

kuchh na roe aah agar hum umr-bhar roya kiye