ishq mein kya chaaragar paida kiya

ishq meñ kyā chārāgar paidā kiyā

de ke dil dard-e-jigar paidā kiyā

zulf chehre se haTā kar aap ne

jalva-e-nūr-e-sahar paidā kiyā

garche apnī jaan dī farhād ne

naam ulfat meñ magar paidā kiyā

is tarah us ne baḌhāyā rabt-zabt

rafta-rafta dil meñ ghar paidā kiyā

hāl-e-dil vo ġhaur se sunñe lage

jazb-e-ulfat ne asar paidā kiyā

choT khaa.ī furqat-e-dildār kī

ham ne patthar kā jigar paidā kiyā

dil lagā kar ho ga.e bīmār-e-ġham

baiThe baiThe dard-e-sar paidā kiyā

aaj tak rāh-e-ḳhudā meñ kyā diyā

yuuñ to kaafī māl-o-zar paidā kiyā

ham ne apnī ājizī se āḳhirash

dushmanoñ ke dil meñ ghar paidā kiyā

chauñk chauñk uTThe vo ḳhvāb-e-nāz se

mere nāloñ ne asar paidā kiyā

husn gar tujh ko kiyā haq ne atā

mujh ko bhī ahl-e-nazar paidā kiyā

fitna-o-shar aadmī meñ kyoñ na ho

us ko jab haq ne bashar paidā kiyā

mujh ko qudrat ne azal se dosto

un kā manzūr-e-nazar paidā kiyā

umr bhar 'hājir' ba-juz husn-e-kalām

kaun sā ham ne hunar paidā kiyā

ishq mein kya chaaragar paida kiya

de ke dil dard-e-jigar paida kiya

zulf chehre se haTa kar aap ne

jalwa-e-nur-e-sahar paida kiya

garche apni jaan di farhad ne

nam ulfat mein magar paida kiya

is tarah us ne baDhaya rabt-zabt

rafta-rafta dil mein ghar paida kiya

haal-e-dil wo ghaur se sunne lage

jazb-e-ulfat ne asar paida kiya

choT khai furqat-e-dildar ki

hum ne patthar ka jigar paida kiya

dil laga kar ho gae bimar-e-gham

baiThe baiThe dard-e-sar paida kiya

aaj tak rah-e-KHuda mein kya diya

yun to kafi mal-o-zar paida kiya

hum ne apni aajizi se aaKHirash

dushmanon ke dil mein ghar paida kiya

chaunk chaunk uTThe wo KHwab-e-naz se

mere nalon ne asar paida kiya

husn gar tujh ko kiya haq ne ata

mujh ko bhi ahl-e-nazar paida kiya

fitna-o-shar aadmi mein kyon na ho

us ko jab haq ne bashar paida kiya

mujh ko qudrat ne azal se dosto

un ka manzur-e-nazar paida kiya

umr bhar 'hajir' ba-juz husn-e-kalam

kaun sa hum ne hunar paida kiya