ishq mein sarfaraaz hain hum log

ishq meñ sarfarāz haiñ ham log

sāhib-e-imtiyāz haiñ ham log

pūchhnā kyā hamārī hastī kā

terī hastī kā raaz haiñ ham log

har musībat ko naaz hai jin par

vo musībat-navāz haiñ ham log

sham.a roī hai dekh kar jin ko

vo sarāpā gudāz haiñ ham log

ma.asiyat aur tasavvur-e-rahmat

kis qadar pāk-bāz haiñ ham log

mahfil-e-dār ho ki bazm-e-vafā

har jagah sarfarāz haiñ ham log

kyoñ na rangīñ ho naġhma apnā 'bahār'

barbat-e-soz-o-sāz haiñ ham log

ishq mein sarfaraaz hain hum log

sahib-e-imtiyaz hain hum log

puchhna kya hamari hasti ka

teri hasti ka raaz hain hum log

har musibat ko naz hai jin par

wo musibat-nawaz hain hum log

shama roi hai dekh kar jin ko

wo sarapa gudaz hain hum log

masiyat aur tasawwur-e-rahmat

kis qadar pak-baz hain hum log

mahfil-e-dar ho ki bazm-e-wafa

har jagah sarfaraaz hain hum log

kyon na rangin ho naghma apna 'bahaar'

barbat-e-soz-o-saz hain hum log