ishq mein wasl ki tadbir batane wala

ishq meñ vasl kī tadbīr batāne vaalā

kaun thā zahr ko iksīr batāne vaalā

hogā nā-vāqif-e-ādāb-e-mohabbat koī

halqa-e-zulf ko zanjīr batāne vaalā

aa.ina dekh ke samjhā huuñ ki sach kahtā thā

vo mujhe aap kī tasvīr batāne vaalā

mus.haf-e-ruḳh kī bhī tafsīr batātā jaa.e

lafz-e-qur.ān kī tafsīr batāne vaalā

maiñ hī yūsuf thā zuleḳhā ke qafas meñ kal shab

hai koī ḳhvāb kī ta.abīr batāne vaalā

vo jo kahtā thā mire haath kī rekhā meñ hai tū

kitnā jhūTā thā vo taqdīr batāne vaalā

laa.ī hai maut ko ab sāmne taqdīr mirī

ab batā.e koī tadbīr batāne vaalā

vo bhī hogā koī majrūh yaqīnan yaaro

abrū-e-nāz ko shamshīr batāne vaalā

'ehtishām' itne baḌe shahr meñ koī na milā

is nazar meñ tirī tauqīr batāne vaalā

ishq mein wasl ki tadbir batane wala

kaun tha zahr ko iksir batane wala

hoga na-waqif-e-adab-e-mohabbat koi

halqa-e-zulf ko zanjir batane wala

aaina dekh ke samjha hun ki sach kahta tha

wo mujhe aap ki taswir batane wala

mushaf-e-ruKH ki bhi tafsir batata jae

lafz-e-quran ki tafsir batane wala

main hi yusuf tha zuleKHa ke qafas mein kal shab

hai koi KHwab ki tabir batane wala

wo jo kahta tha mere hath ki rekha mein hai tu

kitna jhuTa tha wo taqdir batane wala

lai hai maut ko ab samne taqdir meri

ab batae koi tadbir batane wala

wo bhi hoga koi majruh yaqinan yaro

abru-e-naz ko shamshir batane wala

'ehtisham' itne baDe shahr mein koi na mila

is nazar mein teri tauqir batane wala