ishq mein wo but agar talwar hota jaega

'ishq meñ vo but agar talvār hotā jā.egā

dil mirā shā.ista-e-paikār hotā jā.egā

ḳhushbūoñ se peḌ kī shāḳheñ mahaktī jā.eñgī

ek ik ġhuncha samar-āsār hotā jā.egā

dekhne vāloñ kī āñkheñ band hotī jā.eñgī

aur har manzar pas-e-dīvār hotā jā.egā

dhīre dhīre dhuup nuqte meñ simaTtī jā.egī

āsmāñ par abr gauhar-bār hotā jā.egā

sub.h-dam ujle parinde shāḳh par aa jā.eñge

aur phir saarā shajar bedār hotā jā.egā

dekhtā jā.egā muḌ-muḌ kar mujhe merā ġhazāl

aur nazar kā tiir dil ke paar hotā jā.egā

sāhiloñ par dhuup kī pariyāñ nahātī jā.eñgī

qāmat-e-āb-e-ravāñ sarshār hotā jā.egā

'ishq mein wo but agar talwar hota jaega

dil mera shaista-e-paikar hota jaega

KHushbuon se peD ki shaKHen mahakti jaengi

ek ek ghuncha samar-asar hota jaega

dekhne walon ki aankhen band hoti jaengi

aur har manzar pas-e-diwar hota jaega

dhire dhire dhup nuqte mein simaTti jaegi

aasman par abr gauhar-bar hota jaega

subh-dam ujle parinde shaKH par aa jaenge

aur phir sara shajar bedar hota jaega

dekhta jaega muD-muD kar mujhe mera ghazal

aur nazar ka tir dil ke par hota jaega

sahilon par dhup ki pariyan nahati jaengi

qamat-e-ab-e-rawan sarshaar hota jaega