ishq mere liye azab hua

ishq mere liye azaab huā

maiñ bhī kyā ḳhānumāñ-ḳharāb huā

jis ne chhoḌā na dāman-e-ummīd

zindagī meñ vo kāmyāb huā

merī nekī ko bhī vo shar samjhe

har gunah un kā ik savāb huā

jab huī duur har ġhalat-fahmī

vo nadāmat se aab aab huā

mujh se milte hī us kā rū-e-hasīñ

ek khiltā huā gulāb huā

kyā chhupātā fareb-kārī vo

rū-ba-rū sab ke be-naqāb huā

ham se milte rahe vo parde meñ

aur ġhairoñ se ijtināb huā

shaiḳh sāhib bhī ham-piyāla the

ham pe hī kyoñ ye ehtisāb huā

chor ko hī chunā gayā mukhiyā

vaah kyā ḳhuub intiḳhāb huā

jab bhī aa.e vo yaad ham ko 'shāz'

ik ajab dil meñ iztirāb huā

ishq mere liye azab hua

main bhi kya KHanuman-KHarab hua

jis ne chhoDa na daman-e-ummid

zindagi mein wo kaamyab hua

meri neki ko bhi wo shar samjhe

har gunah un ka ek sawab hua

jab hui dur har ghalat-fahmi

wo nadamat se aab aab hua

mujh se milte hi us ka ru-e-hasin

ek khilta hua gulab hua

kya chhupata fareb-kari wo

ru-ba-ru sab ke be-naqab hua

hum se milte rahe wo parde mein

aur ghairon se ijtinab hua

shaiKH sahib bhi ham-piyala the

hum pe hi kyon ye ehtisab hua

chor ko hi chuna gaya mukhiya

wah kya KHub intiKHab hua

jab bhi aae wo yaad hum ko 'shaz'

ek ajab dil mein iztirab hua