ishq ne kaisa karishma kar diya

'ishq ne kaisā karishma kar diyā

ham ko majnūñ un ko lailā kar diyā

baat un ko chāhne kī thī faqat

duniyā vāloñ ne tamāshā kar diyā

sar-bulandī 'ishq kī maqsūd thī

ham ne apnī jaañ kā saudā kar diyā

muflisī jab aa ga.ī īmān tak

ham ne apne sar kā saudā kar diyā

jhuuT kī bhī apnī ik auqāt thī

jhuuT ko bhī us ne rusvā kar diyā

zindagī se mā’rka-ārā.ī thī

maut ne sab khel ulTā kar diyā

nuur vāloñ kī are kyā baat hai

goshe-goshe meñ ujālā kar diyā

sarfaroshī kī tamanna ne 'samar'

sar hamārā aur ūñchā kar diyā

'ishq ne kaisa karishma kar diya

hum ko majnun un ko laila kar diya

baat un ko chahne ki thi faqat

duniya walon ne tamasha kar diya

sar-bulandi 'ishq ki maqsud thi

hum ne apni jaan ka sauda kar diya

muflisi jab aa gai iman tak

hum ne apne sar ka sauda kar diya

jhuT ki bhi apni ek auqat thi

jhuT ko bhi us ne ruswa kar diya

zindagi se ma’rka-arai thi

maut ne sab khel ulTa kar diya

nur walon ki are kya baat hai

goshe-goshe mein ujala kar diya

sarfaroshi ki tamanna ne 'samar'

sar hamara aur uncha kar diya