ishq oDha ishq pahna ishq ko mazhab kiya

'ishq oḌhā 'ishq pahnā 'ishq ko maz.hab kiyā

kaam kuchh is ke 'alāva 'āshiqoñ ne kab kiyā

pahle pahle pyaar kī pahlī ḳhatā kā irtikāb

pūchhiye mat kab kiyā bas jab kiyā so tab kiyā

kuchh nahīñ rakhtī ma'ānī kāmyābī dahr kī

surḳh-rūī us ne paa.ī jis ne raazī rab kiyā

vo bhī din the jab mirī chāhat ko paane ke liye

ik madārī kī tarah us ne har ik kartab kiyā

nāchnā kab ham ko aayā zindagī ke taal par

kaam jo kuchh bhī kiyā ham ne vahī beDhab kiyā

nok-e-shamshīr-e-'alī ne kar diyā qissa tamām

vaqt ne jab bil-muqābil lā khaḌā marhab kiyā

'ishq oDha 'ishq pahna 'ishq ko mazhab kiya

kaam kuchh is ke 'alawa 'ashiqon ne kab kiya

pahle pahle pyar ki pahli KHata ka irtikab

puchhiye mat kab kiya bas jab kiya so tab kiya

kuchh nahin rakhti ma'ani kaamyabi dahr ki

surKH-rui us ne pai jis ne raazi rab kiya

wo bhi din the jab meri chahat ko pane ke liye

ek madari ki tarah us ne har ek kartab kiya

nachna kab hum ko aaya zindagi ke tal par

kaam jo kuchh bhi kiya hum ne wahi beDhab kiya

nok-e-shamshir-e-'ali ne kar diya qissa tamam

waqt ne jab bil-muqabil la khaDa marhab kiya