ishq se ishq ke anjam ki baaten hongi

ishq se ishq ke anjām kī bāteñ hoñgī

sub.h tak aap kī phir shaam se bāteñ hoñgī

duur manzil hai havā.eñ bhī muḳhālif sī haiñ

do ghaḌī baiTho to ārām se bāteñ hoñgī

jis tarah hotī hai rindoñ kī ḳharābāt se baat

is tarah gardish-e-ayyām se bāteñ hoñgī

sāqiyā ab to ināyat kī nazar ho jaa.e

kab talak mujh se tahī-jām kī bāteñ hoñgī

naaz karte haiñ agar apne ḳhad-o-ḳhāl pe ye

aap ke husn kī asnām se bāteñ hoñgī

inqalāb aa.e to phir himmat-e-mardāñ kī qasam

vaqt kī vaqt ke ahkām se bāteñ hoñgī

aao kuchh hausla-e-dil se bhī leñ kaam ai 'nūr'

kab tak ab hasrat-e-nākām se bāteñ hoñgī

ishq se ishq ke anjam ki baaten hongi

subh tak aap ki phir sham se baaten hongi

dur manzil hai hawaen bhi muKHalif si hain

do ghaDi baiTho to aaram se baaten hongi

jis tarah hoti hai rindon ki KHarabaat se baat

is tarah gardish-e-ayyam se baaten hongi

saqiya ab to inayat ki nazar ho jae

kab talak mujh se tahi-jam ki baaten hongi

naz karte hain agar apne KHad-o-KHal pe ye

aap ke husn ki asnam se baaten hongi

inqalab aae to phir himmat-e-mardan ki qasam

waqt ki waqt ke ahkaam se baaten hongi

aao kuchh hausla-e-dil se bhi len kaam ai 'nur'

kab tak ab hasrat-e-nakaam se baaten hongi