ishq se ki ye dil-e-Khaali ne bhar jaane mein dhum

ishq se kī ye dil-e-ḳhālī ne bhar jaane meñ dhuum

Daale jyuuñ kam-zarf mai ke ek do paimāne meñ dhuum

shor tab bastī meñ thā atfāl ke pathrāv kā

ab divāne dil ne Daalā jā ke vīrāne meñ dhuum

dil siyah-mast-e-junūñ hai jab se yuuñ Daalā hai shor

jiyūñ ho fīl-e-mast kī zanjīr khul jaane meñ dhuum

dil meñ yuuñ aatī hai terī yaad ai yār-e-azīz

misr meñ jyuuñ hazrat-e-yūsuf kī thī aane meñ dhuum

kam numā rahtā hai tū ham se hilāl-e-īd sā

jach ga.ī dil meñ tirī abrū nazar aane meñ dhuum

'ishq' ke dāġhoñ ne kī hai dil ke gulshan meñ bahār

hogī kyā laala kī yaañ tashrīf farmāne meñ dhuum

ishq se ki ye dil-e-KHali ne bhar jaane mein dhum

Dale jyun kam-zarf mai ke ek do paimane mein dhum

shor tab basti mein tha atfal ke pathraw ka

ab diwane dil ne Dala ja ke virane mein dhum

dil siyah-mast-e-junun hai jab se yun Dala hai shor

jiyun ho fil-e-mast ki zanjir khul jaane mein dhum

dil mein yun aati hai teri yaad ai yar-e-aziz

misr mein jyun hazrat-e-yusuf ki thi aane mein dhum

kam numa rahta hai tu hum se hilal-e-id sa

jach gai dil mein teri abru nazar aane mein dhum

'ishq' ke daghon ne ki hai dil ke gulshan mein bahaar

hogi kya lala ki yan tashrif farmane mein dhum