ishq shoala na husn shabnam hai

ishq sho.ala na husn shabnam hai

sab tilism-e-sarisht-e-ādam hai

ab ye māyūsiyoñ kā aalam hai

fart-e-rāhat bhī shiddat-e-ġham hai

aaj is kor dil meñ zamāne meñ

kaun terī adā kā mahram hai

kyuuñ kare vo masarratoñ kī talāsh

jis kī fitrat hī ḳhūgar-e-ġham hai

ik qayāmat hai terā har andāz

har adā fitna-e-mujassam hai

aañkh badlī huī hai duniyā kī

jab se terī nigāh barham hai

mere hī dam se terī mahfil kā

jo bhī zarra hai jān-e-ālam hai

apnī taqdīr kī shikāyat kyā

aap kā iltifāt hī kam hai

apnā sarmāya-e-hayāt 'azīz'

dāman-e-tar hai chashm-e-pur-nam hai

ishq shoala na husn shabnam hai

sab tilism-e-sarisht-e-adam hai

ab ye mayusiyon ka aalam hai

fart-e-rahat bhi shiddat-e-gham hai

aaj is kor dil mein zamane mein

kaun teri ada ka mahram hai

kyun kare wo masarraton ki talash

jis ki fitrat hi KHugar-e-gham hai

ek qayamat hai tera har andaz

har ada fitna-e-mujassam hai

aankh badli hui hai duniya ki

jab se teri nigah barham hai

mere hi dam se teri mahfil ka

jo bhi zarra hai jaan-e-alam hai

apni taqdir ki shikayat kya

aap ka iltifat hi kam hai

apna sarmaya-e-hayat 'aziz'

daman-e-tar hai chashm-e-pur-nam hai