ishq us se kiya hai to ye gar yaad bhi rakkho

ishq us se kiyā hai to ye gar yaad bhī rakkho

apne liye har din na.ī uftād bhī rakkho

ḳhud apne liye aap sazā bhī karo tajvīz

munsif bhī bano ujratī jallād bhī rakkho

jo haath kare baḳhiya-garī chāk-e-jigar kī

us haath meñ ab ḳhanjar-e-bedād bhī rakkho

ham log to har-hāl meñ rahte haiñ sadā ḳhush

jo ḳhush nahīñ rahte unheñ nāshād bhī rakkho

mumkin ho to is anjuman-ārā.ī meñ taaza

ik zaḳhm-e-dil-e-ḳhānamāñ-barbād bhī rakkho

jis shaḳhs ne dī likh ke tumheñ apnī asīrī

us shaḳhs ko ik pal kabhī āzād bhī rakkho

ye kār-e-jahāñ ab to sameTā nahīñ jaatā

behtar hai ki apnā koī ham-zād bhī rakkho

shīshe meñ utāro kisī nāzuk sī parī ko

qabze meñ koī apne parī-zād bhī rakkho

ye ghar koī mehmān-sarā to nahīñ jis meñ

ik pal bhī na Thahro use ābād bhī rakkho

aatā hai hameñ jaañ se guzarne kā amal ḳhuub

tum chāho to teġh-e-sitam-ījād bhī rakkho

ye ziist jū-e-shīr hai ai 'ḳhusrav'-e-sānī

lāzim hai tumheñ taisha-e-farhād bhī rakkho

ishq us se kiya hai to ye gar yaad bhi rakkho

apne liye har din nai uftad bhi rakkho

KHud apne liye aap saza bhi karo tajwiz

munsif bhi bano ujrati jallad bhi rakkho

jo hath kare baKHiya-gari chaak-e-jigar ki

us hath mein ab KHanjar-e-bedad bhi rakkho

hum log to har-haal mein rahte hain sada KHush

jo KHush nahin rahte unhen nashad bhi rakkho

mumkin ho to is anjuman-arai mein taza

ek zaKHm-e-dil-e-KHanaman-barbaad bhi rakkho

jis shaKHs ne di likh ke tumhein apni asiri

us shaKHs ko ek pal kabhi aazad bhi rakkho

ye kar-e-jahan ab to sameTa nahin jata

behtar hai ki apna koi ham-zad bhi rakkho

shishe mein utaro kisi nazuk si pari ko

qabze mein koi apne pari-zad bhi rakkho

ye ghar koi mehman-sara to nahin jis mein

ek pal bhi na Thahro use aabaad bhi rakkho

aata hai hamein jaan se guzarne ka amal KHub

tum chaho to tegh-e-sitam-ijad bhi rakkho

ye zist ju-e-shir hai ai 'KHusraw'-e-sani

lazim hai tumhein taisha-e-farhad bhi rakkho