ishq wali gham-zada ya dosti wali karen

'ishq vaalī ġham-zada yā dostī vaalī kareñ

ham suḳhanvar haiñ batāo shā'irī kaisī kareñ

bach ga.e to zindagī lāchār kar degī tumheñ

is liye marne se pahle maut ko raazī kareñ

merā dil merī shikāyat mere dukh merī sazā

aap ko kyā hī paḌī hai aap bas jī jī kareñ

baa'd rusvā.ī koī ġham hī nahīñ rusvā.ī kā

jī meñ aatā hai ki ab rusvā har ik hastī kareñ

ai mohabbat tujh se kyoñ bhartā nahīñ āḳhir ye dil

kitnā dil ko dard deñ aur kitnā dil zaḳhmī kareñ

hijr kī dīvār par tasvīr hai ik hijr kī

sochte haiñ bārhā sīdhī kareñ ulTī kareñ

vo jinhoñ ne ḳhvāhisheñ pe ḳhvāhisheñ taslīm kiiñ

zindagī achchhī kaTegī ḳhvāhisheñ chhoTī kareñ

dil dukhā kar bolte haiñ kitne dil-jū log haiñ

jaane vaale ab tumhārī fikr bhī kitnī kareñ

dard hī bas dard aur is ke 'alāva kuchh nahīñ

ab kareñ to kyā kareñ kyā dard kī khetī kareñ

bebasī hī bebasī hai bebasī hī bebasī

aur kitnā ruuh ko apnī batā qaidī kareñ

'ishq wali gham-zada ya dosti wali karen

hum suKHanwar hain batao sha'iri kaisi karen

bach gae to zindagi lachaar kar degi tumhein

is liye marne se pahle maut ko raazi karen

mera dil meri shikayat mere dukh meri saza

aap ko kya hi paDi hai aap bas ji ji karen

ba'd ruswai koi gham hi nahin ruswai ka

ji mein aata hai ki ab ruswa har ek hasti karen

ai mohabbat tujh se kyon bharta nahin aaKHir ye dil

kitna dil ko dard den aur kitna dil zaKHmi karen

hijr ki diwar par taswir hai ek hijr ki

sochte hain barha sidhi karen ulTi karen

wo jinhon ne KHwahishen pe KHwahishen taslim kin

zindagi achchhi kaTegi KHwahishen chhoTi karen

dil dukha kar bolte hain kitne dil-ju log hain

jaane wale ab tumhaari fikr bhi kitni karen

dard hi bas dard aur is ke 'alawa kuchh nahin

ab karen to kya karen kya dard ki kheti karen

bebasi hi bebasi hai bebasi hi bebasi

aur kitna ruh ko apni bata qaidi karen