ishq wahshat hua wahshat se junun-KHez hua

ishq vahshat huā vahshat se junūñ-ḳhez huā

ya.anī paimānā mirā aag se labrez huā

chāñd sūraj ko bulā letā hai ghar meñ apne

terā shā.ir to tire ishq meñ tabrez huā

terī ḳhushbū se mirī ruuh pe taarī hai surūr

tere bose se mirā lab gul-e-nau-ḳhez huā

is tarah mujh meñ samāyā hai ki ik nūr-e-ḳhudā

arsh se aa ke mirī ruuh meñ aamez huā

chhū gayā terā dupaTTa jo achānak mujh se

dhaḌkaneñ baḌhne lagīñ ḳhuuñ sharar-añgez huā

karvaTeñ letā rahā dard mirī palkoñ par

dasht-e-imkān-e-vafā zaḳhm se gul-rez huā

tere ehsās ne badlā hai tasavvur kā mizāj

terā gul-rang mirī fikr kā rañgrez huā

dhuup jab ruḳh kī tere utrī mirī āñkhoñ meñ

gulshan-e-ishq chamak uTThā dil-āvez huā

vaqt-e-sajda jo tire paañv pe Tapkā thā 'nadīm'

qatra-e-ashk mirā sail-e-balā-ḳhez huā

ishq wahshat hua wahshat se junun-KHez hua

yani paimana mera aag se labrez hua

chand suraj ko bula leta hai ghar mein apne

tera shair to tere ishq mein tabrez hua

teri KHushbu se meri ruh pe tari hai surur

tere bose se mera lab gul-e-nau-KHez hua

is tarah mujh mein samaya hai ki ek nur-e-KHuda

arsh se aa ke meri ruh mein aamez hua

chhu gaya tera dupaTTa jo achanak mujh se

dhaDkanen baDhne lagin KHun sharar-angez hua

karwaTen leta raha dard meri palkon par

dasht-e-imkan-e-wafa zaKHm se gul-rez hua

tere ehsas ne badla hai tasawwur ka mizaj

tera gul-rang meri fikr ka rangrez hua

dhup jab ruKH ki tere utri meri aankhon mein

gulshan-e-ishq chamak uTTha dil-awez hua

waqt-e-sajda jo tere panw pe Tapka tha 'nadim'

qatra-e-ashk mera sail-e-bala-KHez hua