kankar Thahre pani mein

kankar Thahre paanī meñ

ā.īna hairānī meñ

jaadū laḌkī mahal-sarā

sab thā ek kahānī meñ

jaane kyā kyā bol ga.e

ham bhī raat ravānī meñ

bhuul hī jaanā behtar hai

jo bhī huā nādānī meñ

niiñd hameñ aa jaatī thī

aksar biich kahānī meñ

naag aur nāgin rahte the

apnī raat kī raanī meñ

zahr ye kis ne ghol diyā

ThanDe mīThe paanī meñ

aag ye kis ne bhaḌkā.ī

mausam kī jaulānī meñ

ek aaseb makānoñ meñ

ik dil kī vīrānī meñ

ek andesha ghar meñ hai

aur ik naql-e-makānī meñ

ek karishma aag meñ hai

ek karāmat paanī meñ

ek tamāsha harf meñ hai

ik tamsīl ma'ānī meñ

farq to āḳhir honā thā

'ġhālib' aur 'ḳhāqānī' meñ

kankar Thahre pani mein

aaina hairani mein

jadu laDki mahal-sara

sab tha ek kahani mein

jaane kya kya bol gae

hum bhi raat rawani mein

bhul hi jaana behtar hai

jo bhi hua nadani mein

nind hamein aa jati thi

aksar bich kahani mein

nag aur nagin rahte the

apni raat ki rani mein

zahr ye kis ne ghol diya

ThanDe miThe pani mein

aag ye kis ne bhaDkai

mausam ki jaulani mein

ek aaseb makanon mein

ek dil ki virani mein

ek andesha ghar mein hai

aur ek naql-e-makani mein

ek karishma aag mein hai

ek karamat pani mein

ek tamasha harf mein hai

ek tamsil ma'ani mein

farq to aaKHir hona tha

'ghaalib' aur 'KHaqani' mein