ishrat ka KHayal aae aur dil mein malal aae

ishrat kā ḳhayāl aa.e aur dil meñ malāl aa.e

yuuñ jis kā ḳhayāl aa.e ḳhaak us kā ḳhayāl aa.e

paiġhām-e-bahār aa.e majbūr-e-qafas tak kyoñ

kyoñ ishrat-e-rafta kā ab dil meñ ḳhayāl aa.e

saaqī tirī mahfil meñ andesha-e-fardā kyā

sāġhar liye tū aa.e aur fikr-e-ma.āl aa.e

kuchh hosh nahīñ ham ko paimān-e-vafā kyā thā

ham sub.h-e-azal hī se sarmast-e-ḳhayāl aa.e

ma.alūm nahīñ 'shāriq' kyoñ chāk-garebāñ haiñ

phūloñ se koī pūchhe kyā ho ke nihāl aa.e

ishrat ka KHayal aae aur dil mein malal aae

yun jis ka KHayal aae KHak us ka KHayal aae

paigham-e-bahaar aae majbur-e-qafas tak kyon

kyon ishrat-e-rafta ka ab dil mein KHayal aae

saqi teri mahfil mein andesha-e-farda kya

saghar liye tu aae aur fikr-e-maal aae

kuchh hosh nahin hum ko paiman-e-wafa kya tha

hum subh-e-azal hi se sarmast-e-KHayal aae

malum nahin 'shaariq' kyon chaak-gareban hain

phulon se koi puchhe kya ho ke nihaal aae