ishrat ki haqiqat kya hasti ki musibat kya

ishrat kī haqīqat kyā hastī kī musībat kyā

mere liye duniyā meñ ab ranj kyā rāhat kyā

uf vus.at-e-sahrā-e-hastī kī ye kotāhī

sab qaidi-e-zindāñ haiñ maiñ kyā mirī vahshat kyā

ro.uuñ to sukūñ paa.e taḌpūñ to mazā aa.e

paa.ī hai muqaddar se zālim ne tabī.at kyā

kis haal meñ honā thā kis haal ko jā pahuñchī

hai jins-e-vafā terī bāzār meñ qīmat kyā

jab ḳhud ko miTā Daalā ghar-bār luTā Daalā

jab jā ke ye jaanā hai hotī hai muravvat kyā

āñkhoñ se Tapak jaa.e yā ḳhaak meñ mil jaa.e

dil kyoñ rahe siine meñ ab is kī zarūrat kyā

ai 'ḳhizr' dhaḌaktā hai dil kyoñ mirā rah rah kar

hairāñ huuñ batā.ūñ bhī is baat kī bābat kyā

ishrat ki haqiqat kya hasti ki musibat kya

mere liye duniya mein ab ranj kya rahat kya

uf wusat-e-sahra-e-hasti ki ye kotahi

sab qaidi-e-zindan hain main kya meri wahshat kya

roun to sukun pae taDpun to maza aae

pai hai muqaddar se zalim ne tabiat kya

kis haal mein hona tha kis haal ko ja pahunchi

hai jins-e-wafa teri bazar mein qimat kya

jab KHud ko miTa Dala ghar-bar luTa Dala

jab ja ke ye jaana hai hoti hai murawwat kya

aankhon se Tapak jae ya KHak mein mil jae

dil kyon rahe sine mein ab is ki zarurat kya

ai 'KHizr' dhaDakta hai dil kyon mera rah rah kar

hairan hun bataun bhi is baat ki babat kya