ishrat ne tamannaon ko bazar kiya hai

'ishrat ne tamannāoñ ko bāzār kiyā hai

majbūrī ne har shai ko ḳharīdār kiyā hai

Dar thā ki kahīñ maiñ bhī na ban jā.ūñ farishta

ye soch ke apne ko gunahgār kiyā hai

milne ko zarūr ā.eñge ik roz dar-o-bām

mujh ko isī ummīd ne dīvār kiyā hai

ḳhush-rang parinde to nahīñ karte baserā

ik peḌ ne shāḳhoñ ko ḳhabar-dār kiyā hai

lafzoñ meñ utar aa.ī hai sāzish kī siyāhī

is 'ahd ne afvāhoñ ko aḳhbār kiyā hai

tā'mīr meñ aatī hai nazar ḳhuun kī laalī

logoñ ne kise ḳhvāb kā me.amār kiyā hai

ye baat utartī nahīñ sūraj ke gale se

tārīkī ne jugnū se bahut pyaar kiyā hai

chingāriyāñ dāman meñ bhare ek diye ne

be-samt havāoñ ko giraftār kiyā hai

phir shaam kī shāḳhoñ pe haiñ yādoñ ke basere

phir us ne mirī raat ko gulzār kiyā hai

phir hai dil-e-nādāñ ko kisī ġham kī zarūrat

ḳhushiyoñ ne to jaise mujhe bīmār kiyā hai

'ishrat ne tamannaon ko bazar kiya hai

majburi ne har shai ko KHaridar kiya hai

Dar tha ki kahin main bhi na ban jaun farishta

ye soch ke apne ko gunahgar kiya hai

milne ko zarur aaenge ek roz dar-o-baam

mujh ko isi ummid ne diwar kiya hai

KHush-rang parinde to nahin karte basera

ek peD ne shaKHon ko KHabar-dar kiya hai

lafzon mein utar aai hai sazish ki siyahi

is 'ahd ne afwahon ko aKHbar kiya hai

ta'mir mein aati hai nazar KHun ki lali

logon ne kise KHwab ka meamar kiya hai

ye baat utarti nahin suraj ke gale se

tariki ne jugnu se bahut pyar kiya hai

chingariyan daman mein bhare ek diye ne

be-samt hawaon ko giraftar kiya hai

phir sham ki shaKHon pe hain yaadon ke basere

phir us ne meri raat ko gulzar kiya hai

phir hai dil-e-nadan ko kisi gham ki zarurat

KHushiyon ne to jaise mujhe bimar kiya hai