isi ada pe sitamgar ka sar buland hua

isī adā pe sitamgar kā sar buland huā

nazar vahāñ pe uThī dil yahāñ pe band huā

ḳhudā rakhe ik unhī ko taras nahīñ aayā

raqīb tak mirī hālat pe dard-mand huā

baḌhā na rāh-e-mohabbat pe kārvān-e-junūñ

ḳhudā kā shukr ki naala mirā buland huā

jo ham na kar sake piirī ne kar diyā aa kar

charāġh-e-husn bujhā un kā kaam band huā

sazā-e-'ishq na kartā talab maiñ ḳhātir-e-ġhair

vo 'umr bhar ke liye un ke dil meñ band huā

hameñ visāl se matlab unheñ visāl se ḳhaar

pasand jo thā hameñ un ko nā-pasand huā

ilāhī ḳhair ki 'arsh-e-barīñ bhī Taap gayā

ḳhayāl-e-hazrat-e-'hāris' 'ajab buland huā

isi ada pe sitamgar ka sar buland hua

nazar wahan pe uThi dil yahan pe band hua

KHuda rakhe ek unhi ko taras nahin aaya

raqib tak meri haalat pe dard-mand hua

baDha na rah-e-mohabbat pe karwan-e-junun

KHuda ka shukr ki nala mera buland hua

jo hum na kar sake piri ne kar diya aa kar

charagh-e-husn bujha un ka kaam band hua

saza-e-'ishq na karta talab main KHatir-e-ghair

wo 'umr bhar ke liye un ke dil mein band hua

hamein visal se matlab unhen visal se KHar

pasand jo tha hamein un ko na-pasand hua

ilahi KHair ki 'arsh-e-barin bhi Tap gaya

KHayal-e-hazrat-e-'haaris' 'ajab buland hua