isi bais zamana ho gaya hai usko ghar baiThe

isī baa.is zamāna ho gayā hai us ko ghar baiThe

vo Dartī hai kahīñ koī mohabbat hī na kar baiThe

hamārā jurm ye hai ham ne kyuuñ insāf chāhā thā

hamārā faisla karne ka.ī bedād-gar baiThe

kahāñ tak ḳhāna-e-dil ab maiñ terī ḳhair mānūñgā

zarā sailāb aayā aur tire dīvār-o-dar baiThe

mayassar phir na hogā chilchilātī dhuup meñ chalnā

yahīñ ke ho rahoge saa.e meñ ik pal agar baiThe

bahut ghūmā phirā tū phir bhī ḳhālī hai tirā kaasa

udhar to daulat-e-dil haath aa.ī ham ko ghar baiThe

uḌā kar le ga.ī duniyā hameñ kin kin jhameloñ meñ

na phir fursat milī ham ko na phir ham umr bhar baiThe

fazā meñ gard ke zarroñ kī sūrat ham muallaq haiñ

na uḌne kī tamannā kī na farsh-e-ḳhāk par baiThe

uḌī hai ḳhaak yādoñ kī umīdoñ kī irādoñ kī

ye miTTī thī ki bujhtī raakh par ham paañv dhar baiThe

palaT kar jab bhī dekhā ḳhaak kī chādar nazar aa.ī

na gard-e-rāh baiThī hai na mere ham-safar baiThe

isi bais zamana ho gaya hai us ko ghar baiThe

wo Darti hai kahin koi mohabbat hi na kar baiThe

hamara jurm ye hai hum ne kyun insaf chaha tha

hamara faisla karne kai bedad-gar baiThe

kahan tak KHana-e-dil ab main teri KHair manunga

zara sailab aaya aur tere diwar-o-dar baiThe

mayassar phir na hoga chilchilati dhup mein chalna

yahin ke ho rahoge sae mein ek pal agar baiThe

bahut ghuma phira tu phir bhi KHali hai tera kasa

udhar to daulat-e-dil hath aai hum ko ghar baiThe

uDa kar le gai duniya hamein kin kin jhamelon mein

na phir fursat mili hum ko na phir hum umr bhar baiThe

faza mein gard ke zarron ki surat hum muallaq hain

na uDne ki tamanna ki na farsh-e-KHak par baiThe

uDi hai KHak yaadon ki umidon ki iradon ki

ye miTTi thi ki bujhti rakh par hum panw dhar baiThe

palaT kar jab bhi dekha KHak ki chadar nazar aai

na gard-e-rah baiThi hai na mere ham-safar baiThe