isi KHayal se dil mein mere ujala hai

isī ḳhayāl se dil meñ mire ujālā hai

dimāġh vaqt kī dhaḌkan ko sunñe vaalā hai

taḌap talab hai mirī tishna-lab samundar huuñ

habāb kahte haiñ jis ko zabāñ pe chhālā hai

tamām ḳhvāb ḳhayālāt ban ke TuuTe haiñ

ye daur dekhiye ab kyā dikhāne vaalā hai

maiñ apne haal se ghabrā ke mar gayā hotā

mujhe to vāqa.ī biite dinoñ ne paalā hai

palaT ke shaam ko vāpas pahuñch bhī pā.ūñgā

is ek soch ne ghar se qadam nikālā hai

maiñ gard ban ke uḌā thā talāsh meñ apnī

tire ḳhayāl ne lekin mujhe sambhālā hai

'shafīq' kaise koī kaifiyat bayāñ hogī

har ek lafz mirī soch kā nivālā hai

isi KHayal se dil mein mere ujala hai

dimagh waqt ki dhaDkan ko sunne wala hai

taDap talab hai meri tishna-lab samundar hun

habab kahte hain jis ko zaban pe chhaala hai

tamam KHwab KHayalat ban ke TuTe hain

ye daur dekhiye ab kya dikhane wala hai

main apne haal se ghabra ke mar gaya hota

mujhe to waqai bite dinon ne pala hai

palaT ke sham ko wapas pahunch bhi paunga

is ek soch ne ghar se qadam nikala hai

main gard ban ke uDa tha talash mein apni

tere KHayal ne lekin mujhe sambhaala hai

'shafiq' kaise koi kaifiyat bayan hogi

har ek lafz meri soch ka niwala hai