isi KHayal se tark unki chah kar na sake

isī ḳhayāl se tark un kī chaah kar na sake

kaheñge log ki do din nibāh kar na sake

hameñ jo dekh liyā jhuk ga.ī hayā se aañkh

idhar-udhar sar-e-mahfil nigāh kar na sake

ḳhudā ke sāmne aayā kuchh is adā se vo shoḳh

ki muñh se uf bhī zarā dād-ḳhvāh kar na sake

tire karam kā bharosā hī zāhidoñ ko nahīñ

isī liye to ye khul kar nigāh kar na sake

rahā ye paas hameñ aap kī nazākat kā

ki dil kā ḳhuun huā muñh se aah kar na sake

tumheñ 'hafīz' se nafrat hai to ye fikr hai kyuuñ

kisī hasīn se vo rasm-o-rāh kar na sake

isi KHayal se tark un ki chah kar na sake

kahenge log ki do din nibah kar na sake

hamein jo dekh liya jhuk gai haya se aankh

idhar-udhar sar-e-mahfil nigah kar na sake

KHuda ke samne aaya kuchh is ada se wo shoKH

ki munh se uf bhi zara dad-KHwah kar na sake

tere karam ka bharosa hi zahidon ko nahin

isi liye to ye khul kar nigah kar na sake

raha ye pas hamein aap ki nazakat ka

ki dil ka KHun hua munh se aah kar na sake

tumhein 'hafiz' se nafrat hai to ye fikr hai kyun

kisi hasin se wo rasm-o-rah kar na sake