isi liye tujhe deta hun dad nafrat ki

isī liye tujhe detā huuñ daad nafrat kī

ki tū ne ishq se pur-e'timād nafrat kī

koī na dil se kisī ko nikāl kar pheñke

kabhī na puurī ho maulā murād nafrat kī

kabhī kabhī vo mujhe pyaar itnā detā thā

kabhī kabhī bahut aatī thī yaad nafrat kī

gulāb suukh ga.e haiñ hue haiñ ḳhaar hare

havas ne pyaar meñ Daalī hai khaad nafrat kī

ye dost barsar-e-paikār hone lag ga.e haiñ

to vaj.h banñe lagī hai fasād nafrat kī

us ek shaḳhs ko chāhūñgā tā-dam-e-āḳhir

vo jis ne mujh se mohabbat ke ba.ad nafrat kī

na koī tiir na sāzish na tohmateñ na hasad

kisī ne mujh se baḌī be-svād nafrat kī

ki us kā dard mohabbat ke dukh se thoḌā hai

ye baat achchhī hai is nā-murād nafrat kī

maiñ is liye bhī mohabbat se baaz aa gayā thā

ki us ke shahr meñ miltī thī daad nafrat kī

isi liye tujhe deta hun dad nafrat ki

ki tu ne ishq se pur-e'timad nafrat ki

koi na dil se kisi ko nikal kar phenke

kabhi na puri ho maula murad nafrat ki

kabhi kabhi wo mujhe pyar itna deta tha

kabhi kabhi bahut aati thi yaad nafrat ki

gulab sukh gae hain hue hain KHar hare

hawas ne pyar mein Dali hai khad nafrat ki

ye dost barsar-e-paikar hone lag gae hain

to wajh banne lagi hai fasad nafrat ki

us ek shaKHs ko chahunga ta-dam-e-aKHir

wo jis ne mujh se mohabbat ke baad nafrat ki

na koi tir na sazish na tohmaten na hasad

kisi ne mujh se baDi be-swad nafrat ki

ki us ka dard mohabbat ke dukh se thoDa hai

ye baat achchhi hai is na-murad nafrat ki

main is liye bhi mohabbat se baz aa gaya tha

ki us ke shahr mein milti thi dad nafrat ki