isi mamul-e-roz-o-shab mein ji ka dusra hona

isī māmūl-e-roz-o-shab meñ jī kā dūsrā honā

havādis ke tasalsul meñ zarā sā kuchh nayā honā

hameñ to dil ko bahlānā paḌā hiile havāle se

tumheñ kaisā lagā bastī kā be-saut-o-sadā honā

sanam bante haiñ patthar jab alag hote haiñ Takrā kar

ajab kār-e-abas miTTī kā miTTī se judā honā

magar phir zindagī bhar bandagī duniyā kī hai varna

kise achchhā nahīñ lagtā hai thoḌā sā ḳhudā honā

miTānā naqsh us ke baaġh kī kohna fasīloñ se

hare pattoñ pe us ke nām-e-nāmī kā likhā honā

isi mamul-e-roz-o-shab mein ji ka dusra hona

hawadis ke tasalsul mein zara sa kuchh naya hona

hamein to dil ko bahlana paDa hile hawale se

tumhein kaisa laga basti ka be-saut-o-sada hona

sanam bante hain patthar jab alag hote hain Takra kar

ajab kar-e-abas miTTi ka miTTi se juda hona

magar phir zindagi bhar bandagi duniya ki hai warna

kise achchha nahin lagta hai thoDa sa KHuda hona

miTana naqsh us ke bagh ki kohna fasilon se

hare patton pe us ke nam-e-nami ka likha hona