isi qusur mein shanon se sar utarte rahe

isī qusūr meñ shānoñ se sar utarte rahe

vo kaise log the jo phir bhī ishq karte rahe

safeñ bañdhī rahīñ kāñToñ kī rāh-e-ulfat meñ

guzarne vaale magar qāfile guzarte rahe

tumhārī āñkhoñ kī vo mauj-ḳhez jhīloñ meñ

safīne Duub ke ummīd ke ubharte rahe

nizām-e-nūr hai mohkam shab-e-siyah ke ḳhilāf

sitāre Duube to sūraj yahāñ ubharte rahe

unhī ko bhuuk se ham ne niDhāl paayā hai

havas ke bande ki jo khet khet charte rahe

qafas bhī ek na.e tarz kā nasheman thā

hamāre baaġh ke bulbul to yūñhī Darte rahe

liyā thā naam tirā aur sazā-e-dār milī

pahuñch ke daar pe phir tujh ko yaad karte rahe

tire baġhair ye maanā ki iztirāb rahā

tire baġhair bhī lamhāt-e-ġham guzarte rahe

shikāriyoñ ko hamesha shikār miltā rahā

hamesha makr ke daane yahāñ bikharte rahe

jo log tul ga.e marne pe jī ga.e haiñ vahī

jo log maut se Darte rahe vo marte rahe

udhar kisī kā thā shīrāza-e-sukūñ darham

kisī ke gesu-e-mushkīñ idhar sañvarte rahe

isi qusur mein shanon se sar utarte rahe

wo kaise log the jo phir bhi ishq karte rahe

safen bandhi rahin kanTon ki rah-e-ulfat mein

guzarne wale magar qafile guzarte rahe

tumhaari aankhon ki wo mauj-KHez jhilon mein

safine Dub ke ummid ke ubharte rahe

nizam-e-nur hai mohkam shab-e-siyah ke KHilaf

sitare Dube to suraj yahan ubharte rahe

unhi ko bhuk se hum ne niDhaal paya hai

hawas ke bande ki jo khet khet charte rahe

qafas bhi ek nae tarz ka nasheman tha

hamare bagh ke bulbul to yunhi Darte rahe

liya tha nam tera aur saza-e-dar mili

pahunch ke dar pe phir tujh ko yaad karte rahe

tere baghair ye mana ki iztirab raha

tere baghair bhi lamhat-e-gham guzarte rahe

shikariyon ko hamesha shikar milta raha

hamesha makr ke dane yahan bikharte rahe

jo log tul gae marne pe ji gae hain wahi

jo log maut se Darte rahe wo marte rahe

udhar kisi ka tha shiraaza-e-sukun darham

kisi ke gesu-e-mushkin idhar sanwarte rahe