isi se ujDa hua lala-zar hai shayad

isī se ujḌā huā lāla-zār hai shāyad

chaman se duur abhī tak bahār hai shāyad

azal se gosh-bar-āvāz hai jahāñ saarā

tirī sadā kā use intizār hai shāyad

usī se tālib-e-jalva pe bijliyāñ na girīñ

abhī hijāb hī meñ vo nigār hai shāyad

pukārtā hai zamāna magar nahīñ suntā

koī samand havā par savār hai shāyad

du'ā ko haath uThā.e hue hai ik bekas

karam kā aap ke ummīd-vār hai shāyad

pahuñch gayā hai jo uḌ kar kisī ke dāman tak

vo merī ḳhāk-e-lahad kā ġhubār hai shāyad

uThā jo dār-e-fanā se gayā vo sū-e-adam

musāfiroñ kī yahī rahguzār hai shāyad

tire karam ne navāzā nahīñ jo ai saaqī

udaas isī se tirā mai-gusār hai shāyad

kalīm-e-tūr ne dekhā thā ai 'tarab' jis ko

usī hasīñ kā zamāna shikār hai shāyad

isi se ujDa hua lala-zar hai shayad

chaman se dur abhi tak bahaar hai shayad

azal se gosh-bar-awaz hai jahan sara

teri sada ka use intizar hai shayad

usi se talib-e-jalwa pe bijliyan na girin

abhi hijab hi mein wo nigar hai shayad

pukarta hai zamana magar nahin sunta

koi samand hawa par sawar hai shayad

du'a ko hath uThae hue hai ek bekas

karam ka aap ke ummid-war hai shayad

pahunch gaya hai jo uD kar kisi ke daman tak

wo meri KHak-e-lahad ka ghubar hai shayad

uTha jo dar-e-fana se gaya wo su-e-adam

musafiron ki yahi rahguzar hai shayad

tere karam ne nawaza nahin jo ai saqi

udas isi se tera mai-gusar hai shayad

kalim-e-tur ne dekha tha ai 'tarab' jis ko

usi hasin ka zamana shikar hai shayad